भांगरभूंय | प्रतिनिधी
गट समितीचे बसकेंत कार्यकर्त्यांची मागणी
भांगरभूंय । बातमीदार
हरमल : येवपी काळांत उमेदवारी खातीर सासपणी केल्यार आनी कार्यकर्त्यांच्या मतांचो आनी सुचवण्यांचो विचार केल्यार मांद्रें मतदारसंघ परत काँग्रेसीचो जातलो. ताका लागून योग्य विचारांचो फुडारी दिवचो अशी मागणी काँग्रेस कार्यकर्त्यांनी हरमला केली.
मांद्रें गट समिती वरवीं बूथ समित्यो स्थापन करपा खातीर मार्गदर्शन बसका हरमल पंचायत सभाघरांत आयोजीत केल्ली. हे बसके मांद्रें मतदारसंघाचे काँग्रेस निरीक्षक घनश्याम रावत, गोंय प्रदेश काँग्रेसीचे सरचिटणीस विजय भिके, उत्तर गोंय जिल्हो पदाधिकारी बिरेंद्र शिरोडकार, प्रदेश उपाध्यक्ष बाबी बागकार, मतदारसंघ बूथनिहाय मुखेली सुदीन नायक, उत्तर गोंय जिल्हो सरचिटणीस प्रणव परब, मांद्रें गट समितीचे अध्यक्ष नारायण रेडकार हाजीर आशिल्ले.
फाटल्या कितल्याशाच वर्सां सावन मांद्रे मतदारसंघांत नारायण रेडकार हे बरें काम करतात. प्रदेश समितीच्या कार्यांत वांटेकार जावपाचें तांच्या मनांत आशिल्लें. पूण मांद्रें कॉग्रेसीचें काम विस्कळिल्ल्यान रेडकार हांकां मांद्रें गट अध्यक्ष म्हणून नियुक्त केल्यात. तांच्या नेतृत्वा खाला मांद्रें बरेंच फुडें सरतलें हातूंत दुबाव ना. फुडले वेंचणुकेंत उत्तर आनी दक्षीण गोंयांत काँग्रेस सुशेगादान वेंचून येतलें, असो विस्वास प्रदेश सरचिटणीस विजय भिके हांणी उक्तायलो.
मांद्रें मतदारसंघांत काँग्रेसीचें काम करपी फुडारी गटाध्यक्षपदार आसात. कार्यकर्त्यांनी आदलें सगळें विसरून पक्षाक फुडें काडचें. असो उलो गोंय प्रदेश काँग्रेस उपाध्यक्ष बाबी बागकार हांणी मारलो.
प्रत्येक बूथ समितींत युवक, बायल कार्यकर्त्यांचो आस्पाव करात आनी पक्ष घटमूट करात असो उलो विरेंद्र शिरोडकार हांणी मारलो. मांद्रें मतदारसंघाची उमेदवारी जाहीर करचे पयलीं कार्यकर्त्यांक विस्वासांत घेतले. उपरांतूच निर्णय घेतले. मांद्रेंचे जनतेचेर पुरायेन विस्वास आसा. हांगाची जनता काँग्रेस पक्षाक सत्तेर हाडपाक मजत करतली अशें निरीक्षक मेघश्याम राऊत हांणी सांगलें.
ह्या वेळार बुथसमिती घटमूट जाल्यार पक्ष नेटान फुडें वतलो, अशें सुदीन नायक हांणी म्हणलें.
मांद्रें काँग्रेसचीं चार- साडे चार हजार मतां आसात. पूण फाटले फावटीं ती मतां मगोच्या उमेदवाराक पडलीं. तीं मतां परत काँग्रेसी कडेन हाडपाक वरीश्ठ पांवड्यार यत्न करतात अशें काँग्रेस कार्यकर्ते नंदकुमार न्हानजी हांणी म्हणलें.
मांद्रे गट काँग्रेस समितीचे अध्यक्ष नारायण रेडकार हांणी प्रदेश काँग्रेस फुडार्यांनी गट समितीची धुरा दिल्ले खातीर उपकार मानले.
ह्या वेळार काँग्रेस कार्यकर्ते कामिल डिसौझा, डोमनीक डिसौझा, मेलवीन डिसौझा, रामचंद्र पालयेकर, नंदकुमार न्हानजी, केरीकार, गंगाराम मांद्रेंकार हेरांनी पक्षकार्या खातीर सुचवण्यो केल्यो. सुत्रनिवेदन मांद्रें गटसमिती सरचिटणीस गुरुदास पांडे आनी उत्तर गोंय युवा सरचिटणीस प्रणव परब हांणी उपकार मानले. हे बसकेक शंभरां परस चड कार्यकर्ते हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
