भांगरभूंय | प्रतिनिधी
वॅबसायटीचेर कोंकणींतल्यान खटले अपलोड करपाक सुरवात; दोन खटले अपलोड
भांगरभूंय । प्रतिनिधी
पणजीः मुंबय उच्च न्यायालया सयत हेर न्यायीक यंत्रणां मुखार चलपी खटले, निकाल आतां कोंकणींतल्यान मेळटले. शेनवारच्यान उच्च न्यायालयाच्या गोंय खंडपिठान आपले वॅबसायटीचेर कोंकणींतल्यान निकाल अपलोड करपाक सुरवात केल्या. ते खातीर खंडपिठाचे अधिकृत वॅबसायटीचेर एक स्वतंत्र पर्याय उपलब्ध करून दिला. शेनवारा दोन खटले हे वॅबसायटीचेर अपलोड केल्यात.
न्यायालयीन कामकाज इंग्लीश भाशेंतल्यान चलता. ताका लागून सर्वसामान्यांक तें सारकें कळना. हेच खातीर देशाचे सरन्यायाधीश धनंजय चंद्रचूड हांणी 25 जानेवारी 2023 ह्या दिसा न्यायालया कडेन संबंदीत नवे सेवेचें लोकार्पण केल्लें. तातूंत सर्वोच्च न्यायालयांतले निकाल लेगीत देशांतल्या विवीध थळावे भाशांनी उपलब्ध करून दितले.
हे आदीं मुंबय उच्च न्यायालयान मराठींतल्यान निकाल उपलब्ध करून दिवपाक सुरवात केल्या. आतां गोंय खंडपिठान लेगीत एक पावल फुडें मारून कोंकणींतल्यान निकाल दिवपाक सुरवात केल्या. ते खातीर राजभाशा संचालनालयाची मजत घेतात. हातूंत वेंचीक निकाल खंडपिठाचे वॅबसायटीर कोंकणींतल्यान उपलब्ध करून दितले. मात, ते न्यायालयीन कामकाजांत वैध आसचे नात. फक्त जनहिता खातीर ते आसतले, अशेंय न्यायालयान स्पश्ट केलां. न्यायालयाचे निकाल कोंकणींतल्यान उपलब्ध जाल्ल्यान गोंयकारांक ताचो व्हड फायदो जातलो. कोंकणी ही गोंयची लोकभास आशिल्ल्यान ती गोंयकारांक बरे तरेन आनी सहजतायेन कळटा. चडशे गोंयकार कोंकणीच उलयतात. हाचे आदीं निकाल इंग्लीश भाशेंतल्यान येताले, ताका लागून ते सर्वसामान्य लोकांक कठीण जाताले. हे खातीर लोकांक कळटा, समजता अशे भाशेंत निकाल उपलब्ध जावप गरजेचें आशिल्लें. आतां न्यायालयाचे निकाल कोंकणींतल्यान उपलब्ध जाल्ल्यान ताचो गोंयकारांक निश्चीत फायदो जातलो.
म्हत्वाच्यो सुनावण्यो लेगीत कोंकणींतल्यान
शेनवारा न्यायालयान सर्वोच्च न्यायालयांतलो हुंड्या संबंदांतलो एक खटलो आनी गोंयांतल्या जमनीच्या म्युटेशना संबंदांतल्या एका खटल्याचें कोंकणींत भाशांतर उपलब्ध करून दिलां. हे मुखार न्यायालयांतल्या म्हत्वाच्या विशयां वयल्यो सुनावण्यो, खटले कोंकणींतल्यान उपलब्ध जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
