भांगरभूंय | प्रतिनिधी
म्हापशें: शारांत डेंग्यू सयत जळारां पसून जावपी दुयेंसां वाडत आसात. ह्या दुयेंसांचेर नियंत्रण दवरपा खातीर नगरपालिका पांवड्यार गरजेचीं तीं पावलां नागरी भलायकी खात्या कडल्यान उबारतात. तरी लेगीत लोकांचे अपेक्षीत सहकार्य मेळना. अशा वेळार जळारांच्या उद्रेकाचो बंदोबस्त करून दुयेंसांचें संक्रमण आडावप होच एकसुरो उपाय आशिल्ल्याचें मत जोड बसकेंत नगरसेवक आनी भलायकी केंद्राच्या अधिकाऱ्यांनी उक्तायलें.
काल (बिरेस्तारा) नगराध्यक्षा प्रिया मिशाळ हांचे अध्यक्षताये खाला तांच्या कॅबिनांत बसका जाली. ह्या वेळार नागरी भलायकी केंद्राचे अधिकारी डॉ. शॅरल डिसाेझा हांणी हाजीर आशिल्ल्या नगरसेवकांक मार्गदर्शन केलें. उपनगराध्यक्ष विराज फडके, नगरसेवक सुधीर कांदोळकार, प्रकाश भिवशेट, तारक आरोलकार, शंशाक नार्वेंकार, नूतन बिचोलकार, सुशांत हरमलकार, किशोरी कोरगांवकार, केल ब्रागांझा, आशिर्वाद खोर्जुंवेंकार ह्या वेळार हाजीर आशिल्ले. हे बसकेंत डेंग्यूचे दुयेंती सांपडिल्ल्या वाठारांतले चडशे नगरसेवक गैरहाजीर रावले. ताका लागून ह्या लोकप्रतिनिधींक लोकांच्या भलायकेची काळजी नाशिल्ल्याचें स्पश्ट जाता.
नागरी भलायकी केंद्रान किटकजन्य दुयेंस नियंत्रण कार्यावळी खाला डेंग्यू प्रतिबंधा विशीं पालिका मंडळांत जागृताय केली. डेंग्यूचो उद्रेक आडावपा खातीर सहकार्य करून लोकां मदीं लोकजागृताय करपाक मजत करची अशें आवाहन डॉ. शॅरल डिसोझा हांणी केलें.
घाण उदक सोकपीट धांपपा खातीर भलायकी केंद्रांन रहिवाशांक जाळयो उपलब्ध केल्यात. पूण लोक ताचो वापर करिनात. पालिका मंडळान ह्यो जाळयो घालपाची खबरदारी घेवची अशी सुचोवणी डॉ. शॅरल डिसोझा हांणी केले उपरांत पालिके वतीन सोकपिटाचेर जाळयो घालपाचें थारलें.
खूबशे कडेन लोक आपल्या घरांनी भाडेकार दवरतात. पूण एकेच कुडींत तांकी परस चड मजूरवर्ग रावतात. संबंदीत कुडीच्या सोकपिटाची तांक खुबूच उणी आसता आनी ती खूबशे फावटी भरून व्हांवता. हो प्रकार जळारांच्या उद्रेकाक पोशक वातावरण थारता. हाचेर पालिका मंडळान नियंत्रण दवरचें अशें आवाहन डॉ. शॅरल डिसोझा हांणी ह्या वेळार केलें.
डेंग्यूचें जळार दिसा उजवाडा चाबता. ताका लागून पुराय कूड झाकून घेवपी लांब कपडे वारपचे. दिसा जळाराची उजवात आनी इलेक्ट्रोनीक वेपोर मॅट वापरचो. घर आनी वाठारांतले उदका सांठे रिते करचे. सांठयिल्ल्या उदकाची आयदनां कापडान धांपून दवरचीं. निरुपेगी टायर नश्ट करचे. गटारां व्हांवती करचीं. घरांच्या दारांक, जनेलांक जाळयो बसोवच्यो अशें आवाहन ह्या वेळार केलें.
जोर आयल्यार सरकारी हॉस्पिटलांनी वा लागींच्या भलायकी केंद्रांनी वच्चें. जोर खंयचेच परिस्थितींत चड दीस आंगार काडचो न्हय. दुयेंसा खातीरचें सर्वोत्तम निदान आनी उपचार सरकारी दवाखान्यांनी फुकट उपलब्ध आसात. घराचे आशिकुशीक उदक सांठोवन दवरूं नाकात. खंयचेंच स्थितींत जळारां खातीर पोशक वातावरण निर्माण करूं नाकात अशें आवाहन नागरी भलायकी केंद्राचे अधिकारी डॉ. शॅरल डिसोझा हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
