दंडाक लागून मडगांवां कोयर जालो उणो

भांगरभूंय | प्रतिनिधी

आमदार दिगंबर कामत: दंडांतल्यान 1.7 लाखांची रक्कम वसूल

मडगांव : उच्च न्यायालयाच्या निर्देशा प्रमाण सोनसड्यार कोयराचे प्रक्रिये खातीर काम बरेंच नेटान सुरू आसा. तशेंच पावस उणो जाल्यार रोखडेच रस्तेय बांदतले. मडगांवां भायर शिमेचेर उडयल्ल्या कोयराचेर कारवाय करून 1.7 लाख दंड वसूल केला. आतां दर दिसा सात ते आठ टन कोयर उणो एकठांय जाता, अशी म्हायती आमदार दिगंबर कामत हांणी दिली.

गोंय घन कोयर वेवस्थापन म्हामंडळान दिल्ल्या 20 एचपी बेलींग मशीनचें उक्तावण सोनसड्यार आमदार कामत हांचे हस्तुकीं जालें. आदलीं बेलींग मशीनां उद्देगीक वसणुकेंत दवरल्यांत. थंय 5 टन कोयराचेर प्रक्रिया करतात. क्लिटंन वाज हाचे कडेन करार केला. साडे सात लाखांचें नवें बेलींग मशीन बसयलां. सोनसड्यार कोयरा विशीं न्यायालयान दिल्ल्या निर्देशा प्रमाण हें काम सुरू आसा. खंयचें काम खंयच्या तारखे मेरेन करचें हाची सुचोवणी न्यायालयान दिल्या. सोनसड्यार बेलींग मशीन वाडोवपाच्या निर्देशा प्रमाण नवें बेलींग मशीन आदल्या मशिना परस चड काम करपाक शकता, अशें आमदार कामत हांणी म्हणलें.
पावस उणो जाल्यार कांय दिसांनी रस्त्याचें डांबरीकरण करतले. रस्त्यार कोयर उडयल्या उपरांत दिल्लो दंड कोणाच्यानूच उणो करूं येना. मशिनां वरवीं दंडाची रक्कम भरून घेतात. मडगांव शारांत ब्लॅक स्पॉट ना. जे आसात ते शाराचे शिमेर. ताचेरूय लक्ष दवरिल्ल्यान कोयर उडयतल्याचेर कारवाय जाता. रातचो कोयर उडोवप्यांचेर कारवाये खातीर आराखडो तयार करतात. ह्यान पयलीं दर दिसा 35 टन कोयर येतालो. आता ब्लॅक स्पॉटाचेर लक्ष दवरिल्ल्यान 25 ते 27 टना मेरेन कोय दर दिसा एकठांय जाता. शाराचे शिमेर कोयर उडोवप्यांक दंड दिल्ल्यान कोयर उडोवप्यांचो आंकडो देंवला. फाटल्या कांय दिसांनी एक लाख 7 हजार रुपयांचो दंड एकठांय जाला. जे गाडयो भरून कोयर उडयताले तांच्यो गाडयो पुलीस स्टेशनार हाडून जप्त केल्यात. तांचे कडल्यान दंड घेतला. भयल्यान मडगांवां हाडून कोयर उडोवप्यांचेर कारवाय जाल्ल्यान 7 ते 8 टन कोयर उणो जाला अशें आमदार कामत हांणी फुडें सांगलें.

पालिकेचे नितळसाण निरीक्षक रातचेय कोयर उडोवप्यांचेर कक्ष दवरून तांचेर कारवाय करतात. ताका लागून कोयरांत उणाव पळोवपाक मेळटा अशें नगराध्यक्ष दामू शिरोडकार हांणी सांगलें.