भांगरभूंय | प्रतिनिधी
वास्को: दाबोळी विमानतळ बंद जातलो ही खबर फटीची आसा. तसो विचारूय करूं नाकात. विधानसभा अधिवेशन सोंपले उपरांत आपूण मुख्यमंत्री, पर्यटन मंत्री हांचे सयत नागरी उड्डाण मंत्री, संरक्षण मंत्री तशेंच वेळ प्रसंगार प्रधानमंत्री हांचीय भेट घेवन संबंदीत प्रस्न मांडटलों. ह्या विमानतळा संबंदीच्यो वावड्यो आपणाक बंद करपाच्यो आसात अशें पंचायत मंत्री मॉवीन गुदिन्हो हांणी काल (बुधवारा) सांगलें.
सांकवाळ वीज उपकेंद्र ते दाबोळी विमानतळ मजगतच्या भुंयगत वीज वाहिन्यो घाल्यात. मंत्री गुदिन्हो हांचे हस्तुकीं दाबोळी विमानतळा वेलें 33 केव्ही वीज स्थानक कार्यान्वीत केलें.
ह्या वेळार मुरगांवचे आमदार संकल्प आमोणकार, वास्कोचे आमदार कृष्णा साळकार, चिखलीचे सरपंच कमलाप्रसाद यादव, दाबोळी विमानतळाचे संचालक धनंजय राव तशेंच हेर मानेस्त हाजीर अशिल्ले.
मंत्री गुदिन्होन म्हणलें की, दाबोळी विमानतळार ज्यो भुंयगत वीज वाहिन्यो घाल्यात ताचो सगलो खर्च विमानतळ प्राधिकरणान उबारला. थंय आनीक विकासकामां जायत आसात. ताका लागून विमानतळ बंद जातलो ह्या वावड्यांक कांयच अर्थ ना. फुडारांत अंतर्गत आनी आंतरराष्ट्रीय विमानसेवा वाडटली. ताका लागून हांगा विमानांक जागोय मेळप कठीण जातलें अशें गुदिन्होन म्हणलें.
टॅक्सीकारांनी मनांतली भिरांत काडून उडोवची. तांणी नव्या तंत्रीक उपकारणांचो वापर करचो. तांणी जगा बरोबर मुखार वचपाची गरज आसा. आमचो कावंटर हांगा आसा ताका लागून गिरायकांनी आमचे कडेन येवचें ही अपेक्षा चुकीची आसा. तांणी अॅपाचो स्विकार करूंक जाय. जाय जाल्यार तांणी आपलो स्वताचो अॅप तयार करचो. जेणे करून कोणाक खंय टॅक्सी जाय हाची म्हायती तांकां मेळटली अशें गुदिन्होन म्हणलें.
पालक मंत्री म्हूण गुदिन्हो आशिल्ल्यान दाबोळी विमानतळ बंद पडचो ना हाची आमकां खात्री आसा. ताका लागून कोणेच भियेवपाची गरज ना अशें आमदार संकल्प आमोणकार हांणी सांगलें.
कृष्णा साळकार हांणी म्हणलें, हांगा नवी इमारत बांदतात. चार एअरोब्रीज जातले. ताका लागून दाबोळी विमानतळ बंद जातलो ही भिरांत लोकांनी मनांतल्यान काडून उडोवची. हांगासरलीं कांय विमानां वळयल्यांत. पूण मुख्यमंत्र्यांनी ह्या प्रकरणांत लक्ष घातलां. दाबोळी विमानतळार पयलीं जितलीं विमानां येतालीं तितलीं येतलीं अशें तांणी म्हणलें.
दाबोळी विमानतळाचे संचालक धनंजय राव हांणी लेगीत दाबोळी विमानतळ बंद जावचो ना हाची गवाय दिली. फुडल्या मे, जून मेरेन विमानतळाच्या विस्तारीत इमारतीचें काम पुराय जातलें. तशेंच प्रवाशांचे संख्येत वाड जातली अशें तांणी सांगलें. कार्गो, पार्कींग सुविधाय वाडयतले. ताका लागून दाबोळी विमानतळ बंद जातलो ह्या वावड्यांक सेगीत स्पश्टीकरण दिवप गरजेचें नाशिल्ल्याचें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
