भांगरभूंय | प्रतिनिधी
वरीश्ठ पुलीस अधिकार्यां कडल्यान सरकारी वाहनांचो दुरूपेग
म्हापशें : एका वरीश्ठ पुलीस अधिकार्याच्या घरा दिसाळें पावोवपा खातीर पुलिसांची गाडी पणजी ते वास्को सदांच प्रवास करता. राज्यांत सगळे कडेन उपलब्ध आशिल्ल्या एका दिसाळ्या खातीर सद्दां पुलीस खातें म्हारगें डिजल खर्च करता.
स म्हयन्या पयलीं ह्या अधिकार्यान राज्यांत पुलीस सेवेचो ताबो घेतला. ते वास्को रावतात. तांकां फाटल्या एप्रील म्हयन्यांत खात्यान 9 लाखांची नवी गाडी घेवन दिल्या. ताच्या घरा खासा पणजेच्यान एक दिसाळें धाडटात. 30 किलोमिटरच्या अंतराचेर फकत दिसाळें पावोवपा खातीर तांणी खासा गाडी दवरल्या. दिसाळें दिवन ही गाडी परतता.
वास्को दिसाळें घेवं येता. पूण ह्या अधिकार्याक तें दिसाळें पणजेचेंच जाय. स म्हयन्यांनी 2 हजार रूपयांच्या दिसाळ्याक 1.80 लाखांचें डिजल वापरपी हो अधिकारी कोण? ताची चर्चा पुलीस मुख्यालयांत सुरू आसा.
दक्षीण गोंयच्या एका वरीश्ठ अधिकार्यान आपले घरकान्नी खातीर खासा सरकारी गाडयेची वेवस्था केल्या. मुख्यालय आसून लेगीत ह्या अधिकार्यान आपल्या घराकूच पुलीस कार्यालय करून उडयलां. तशेंच तांणी आपले गाडयेक व्हड क्रमांक पट्टी आनी कारींतल्या जनेलांक पड्डे घाल्यात. व्हीआयपी प्रमाण व्हड पायलट पुलीस फांटो घेवन हो अधिकारी भोंवता. तांणी उत्तरेच्या राज्यांतली संस्कृताय गोंयांत रुजयल्ल्याचें चित्र पळोवपाक मेळटा.
उत्तरेक रावपी आनी दक्षीण गोंयांत सेवा दिवपी आनीक दोग पुलीस अधिकार्यांच्या भुरग्यांक सरकारी गाडयेंतल्यान कॉलेजींत हाड- व्हर करतात. ह्याय अधिकार्यांक वर्सा पयलीं नव्या गाडयो दिल्यात.
कांय जाण घरकान्नीक, भुरग्यांक घेवन बाजारांत, रातच्या पार्ट्यांक हाड- व्हर करतात. सोयरीं आनी इश्टां गोंयभर भोंवडावपाकूय पुलिसांचे गाडयेचोच वापर करतात.
खुबश्या पुलीस स्टेशनांनी गाडयेचो उणाव जाणवता. अश्या वेळार कनिश्ठ पुलिसांक चवकशे वेळार स्वताचीं वाहनां वापरचीं पडटात. पूण हे अधिकारी मात वाहनांचो दुरुपेग केल्ल्यान तिडक उक्तायत हेर कर्मचारी फक्त चर्चा करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
