भांगरभूंय | प्रतिनिधी
फोंडें : तिस्क-उसगांवची पीडीए मार्केट इमारत सध्या विवीध समस्यांनी घुस्पल्या. फाटल्या कितल्याशाच वर्सां सावन पीडीए मार्केटाचे इमारतीच्या स्लॅबाचे कुडके ह्यान पयलींय कोसळ्ळ्यात. हांगा फुडाराक व्हड दुर्घटना जावपाची शक्यताय आसा.
फाटल्या कितल्याशाच वर्सां सावन पीडीए मार्केट इमारती सुवातेर नवी इमारत उबारपाचें आस्वासन मेळटा. पूण आजूनय राजकीय फुडार्यांक नवी इमारत उबारपाचो म्हूर्त मेळूंक ना. ताका लागून मोडूंक पाविल्ली पिडीएची इमारत राजकी फुडाराच्या आस्वासनाचेर उबी आशिल्ल्याची चर्चा मार्केटांत सुरू आसा.
तेन्नाचे मुख्यमंत्री रवी नायक हांचे संकल्पनेंतल्यान घडिल्ली पीडीए मार्केट इमारत फाटल्या कितल्याशाच वर्सां सावन वायट अवस्थेंत उबी आसा. मार्केटांतल्या विक्रत्यांक कसलेच तरेच्यो सुविधा नात. ताका लागून ते तिडक उक्तायतात. कांय वर्सां आदीं विक्रेत्यांनी पुराय मार्केट बंद उडोवन इमारतीची दुरुस्ती करपाची मागणी केल्ली. पूण सरकारान विक्रेत्यांची दखल आजूनय घेवंक ना.
पीडीए मार्केट इमारतीच्या पयल्या मजल्यार आशिल्लें सभाघर वापरा विणें तशेंच पडून आसा. पयले माळयेर उदकाची गळती जाल्ल्यान तळाक आशिल्ल्या दुकानदारांक ताचो त्रास सोंसचो पडटा. उदक सांठून राविल्ल्या दुकानांचो स्लॅब कोसळपाचे प्रकार अदीं मदीं घडतूच आसतात. फाटल्या दोन-तीन वर्सांनी खुबदां स्टॅब कोसळपाच्यो घडणुको घडल्यात.
इमारतींत आशिल्ल्या हॉटेलाचे धनी सुरेश नायक हांणी सरकारन दुकानदारांक बर्यो सुविधायो दिवपाचो यत्न करपाची गरज आसा. फाटल्या कांय वर्सां सावन स्लॅब कोसळपाच्यो घडणुको वाडतूच आसा. ताका लागून बेगीन दखल घेवपाची गरज तांणी उक्तायली.
पीडीए मार्केटाची इमारतीची अवस्था बिकट जाल्ल्यान हांगा सामान विकतें घेवपाक वचपा खातीर धोको निर्माण जाला. ताका लागून हे इमारती कडेन लक्ष दिवपाची गरज अर्जून गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
