भांगरभूंय | प्रतिनिधी
पणजी : भौशीक सुवातांचेर जंय लोक वचून सोरो पियेतात, ते स्पॉट पुलीस सोदून काडटले. जे कोण भौशीक सुवातांचेर सोरो पियेतात, तांचेर कारवाय जातली, अशें मुख्यमंत्री डॉ. प्रमोद सावंत हांणी सांगलें. अपघातांचें प्रमाण वाडत आसा. हे विशींच्या प्रस्नाक जाप दितना मुख्यमंत्र्यांनी ही म्हायती दिली.
2022 वर्सा राज्यांत 189 फॅटल आनी 85 स्वयंचलीत (सेल्फ फॅटल) अपघात जाले. येरादारी नेम न पाळपी 4 लाख 206 घडणुको नोंद जाल्या. गाडी चलोपाचे 4175 परवाने (लायसना) रद्द जाल्यात. येरादारी नेम मोडप्यां आड कारवाय सुरू आसा. भौशीक बांधकाम खात्यान रस्त्यांची दुरूस्ती (बँकींंग ऑफ रोड) सुरू केल्या, अशें मुख्यमंत्री सावंत हांणी सांगलें. आपल्या आनी हेरांचे सुरक्षीतताये खातीर जापसालदारीन गाडी चलोपाची गरज आसा, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
