भांगरभूंय | प्रतिनिधी
भांगरभूंय । खबरां संस्था
ताश्कंद (उझबेकिस्तान) : हांगाचे एक इमारतींतले लिफ्टींत तीन दीस आडकून बायलेक मरण आयलें. अजापाची गजाल म्हळ्यार तीन दीस कोणाकूच तिचे विशीं कांयच कळूंक ना.
ओल्गा लियोन्टिवा ही डिलिव्हरी ड्रायव्हराचें काम करताली. फाटल्या सप्तकांत सामान दिवपाक ती एके इमारतींत गेल्ली. पूण लिफ्ट मोडिल्ली हें ओल्गाक खबर नाशिल्लें. तिणें लिफ्टीचो वापर केलो. ती णववे माळयेर पावून अचकीत बंद पडली आनी लायटूय गेली. ताका लागून लिफ्टीचें दार लॉक जालें. आलार्मूय बंद पडलो. सुमार तीन दीस ओल्गा थंयच आडकून उरिल्ली. तिणें मजती खातीर उलो मारलो पूण कोणाकूच तिचो आवाज आयकूंक येवंक ना. निमाणो बंद लिफ्टींत घुस्मटून ओल्गाचो अंत जालो.
मजगतीं, ओल्गा घरा पावूंक नाशिल्ल्यान तिच्या घरच्यांनी पुलिशेंत कागाळ केली. पुलिसांनी सीसीटीव्ही वरवीं ओल्गाक सोदून काडली. ओल्गा निमाणी जे इमारतींत गेल्ली तिचो सोद पुलिसांक लागलो. तांकां तिची कूड लिफ्टींत सांपडली.
ही घडणूक घडचे पयलीं हे इमारतींतली लिफ्ट इबाडिल्ल्याची खबर पुराय इमारतींतल्या लोकांक आशिल्ली. वेळार लिफ्टीची दुरुस्ती करूंक नाशिल्ल्या ओल्गाक जीव वगडाचो पडलो. पुलिसांनी संबंदीत इमारतीक नोटीस धाडल्या. निश्काळजीपणाक लागून ही घडणूक घडिल्ल्याचो आरोपूय तांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
