भांगरभूंय | प्रतिनिधी
भांगरभूंय । प्रतिनिधी
पेडणें: आश्वें, मांद्रेंच्या मुखेल रस्त्यार फोंडकुलां पडिल्ल्यान लोकांक बरेच त्रास सोंसचे पडटात. हो रस्तो बेगीन सारको करचो अशी मागणी वाहन चालक करतात.
मांद्रें मतदारसंघांतल्या रस्त्यांचेर पावसांत फोंडकुलां पडटलीं, असो भंय पयलींच नागरिकांनी उक्तायल्लो. तशेंच बांदकाम खातें, रस्तो विभागाक समाजीक संघटणांनी निवेदन सादर करून फोंडकुलां पुरोवपाची मागणी केल्ली. पूण बांदकाम खात्यान हाचे कडेन आडनदर केली. जुलयाच्या निमाण्या सप्तका मेरेन जीं फोंडकुलां पडल्यांत, जातूंत फातर, माती घालपाचें काम सुरू आसा. हें पळयल्यार हे रस्ते कित्याक अपघातांक कारण थारतात तें लक्षांत येतलें.
एक फोंडकूल चुकोवपाक गेल्यार वाहनाचो टायर दुसर्या फोंडकुलांत सांपडटा. हाका वीज खातें जापसालदार आसा. वीज खात्यान जमनी पोंदच्यान लायटीच्यो सरयो घालपाक रस्ते अर्द्या परस चड खणल्यात. पावसा पयलीं ते पुरोवपाचो यत्न करूंक ना. वाहन चालक ह्या फोंडकुलांनी पडून जखमी जाल्यात.
बांदकाम खातें, वीज खात्यान जाय तशे रस्ते खणल्यात. जिल्होधिकार्यान जे नेम दिल्ले ते कंत्राटदारान पाळूंक नाशिल्ल्यान रस्त्याची ही अवस्था जाल्या. फोंडकुलांनी पडून जांचें लुकसाण जालां तांची लुकसाण भरपाय कोण दितलो? असो प्रस्न सध्या लोक विचारतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
