पत्रकारांनी राजकारण्यांचे भकीक पडचें न्हय

भांगरभूंय | प्रतिनिधी

रमाकांत नायक गांवकार: काणकोण पत्रकार संघाची टिळक पुण्यतीथ दबाज्यान

काणकोण: पत्रकार चुको दाखयत आशिल्ल्यान त्यो सुदारूंक संद मेळटा. पत्रकार लोकजागृताय करतात. पत्रकारांनी दाखयिल्ल्या चुकांक लागून विकासकामां करपाक आनी जागृत रावपाक मजत जायत आसता. पत्रकारांनी चुको अवश्य दाखोवच्यो. जेणे करून लोकांक पत्रकाराच्या योग्यतायेची तोखणाय करूंक मेळटली. पत्रकारांनी राजकारण्यांचे भकीक पडचें न्हय अशें काणकोण पालिकेचे नगराध्यक्ष रमाकांत नायक गांवकार हांणी सांगलें.

काणकोण पत्रकार संघान काल (सोमारा) लोकमान्य बाळ गंगाधर टिळक पुण्यतीथ मनोवपा बरोबरूच पत्रकार दीस मनयलो. श्रीस्थळ पंचायत सभाघरांत घडोवन हाडिल्ले हे कार्यावळींत रमाकांत नायक गांवकार उलयताले.

ह्या वेळार माचयेर पैंगीण पंचायतीचे उपसरपंच सुनील पैंगणकार, आदले पत्रकार मान्युएल फर्नांडीस, पत्रकार संघाचे अध्यक्ष बबेश बोरकार, ज्येश्ठ पत्रकार अजीत पैंगीणकार, संघाचे भांडारी संतोष गांवकार, बर्नाड फर्नांडीस, लोक विश्वास प्रतिश्ठाना वतीन चलयतल्या मोखर्ड काणकोण हांगाच्या खासा भुरग्यांच्या शाळेच्यो मुखेली अदिती फळदेसाय माचयेर हाजीर आशिल्ल्यो.

मुखार उलयतना नायक गांवकार हांणी सांगलें, हाचे पयलीं दिसाळ्यांचेर बातमी आयले उपरांत सगली कडेन गंभीरतायेन पळयताले. बातमेक भियेताले. आयज बातमी आनी बातमिदाराचो धाक लोकां मदीं आनी सरकारी नोकरां मदीं उरिल्लो ना. ताचेर गंभीरतायेन विचार करपाची गरज तांणी उक्तायली.

सुनील पैंगीणकार हांणी म्हणलें, काणकोण पत्रकार संघान सामान्यातल्या सामान्य व्यक्तीमत्वाचो भोवमान घडाेवन हाडपा बरोबरूच खासा शाळेच्या शिक्षकांचोच न्हय जाल्यार थंयच्या कर्मचाऱ्यांचो लेगीत भोवमान घडोवन हाडून समाजाक एक नवें उदाहरण घालून दिलें.

पत्रकारिता तितली सोंपी नासता. दिसाळ्यांचेर बातमी छापून आयले उपरांत आमकां ती बातमी कळटा. पूण एक बातमे खातीर बातमिदाराक खूब कश्ट घेवचे पडटात. चार खांब्यांचेर देशाची लोकशाय तिगून आसा. तातूंत जागृत पत्रकारितेचो वांटो आशिल्ल्याचें मान्युएल फर्नांडीस हांणी सांगलें.

अदिती फळदेसाय हांणी आपल्या उलोवपांत म्हणलें, पत्रकार संघान खासा विद्यार्थ्यांक इनामां दितनाच त्या विद्यालयाच्या शिक्षकां बरोबरूच कर्मचाऱ्यांचो लेगीत भोवमान केलो. ही गजाल खूब गरजेची आसा. खासा विद्यार्थ्यांच्या विद्यालयांतल्या शिक्षका बरोबरूच कर्मचारी वर्ग लेगीत भुरग्यांचे जडणघडणींत वांटेकार जायत आसता.

ह्या वेळार विवीध मळार कामगिरी केल्ले राम वरक (उदका पुरवण विभाग), सुरेश वारीक (वीज खातें), गौरेश भैरेली (गोरवां सांबाळ खातें), पूर्णा फळदेसाय भगत (नगर नियोजन खातें) तशेंच काणकोण पत्रकार संघाचे वांगडी देविदास गांवकार आनी नारायण देसाय ह्या पत्रकारांचो ह्या वेळार भोवमान केलो. तशेंच पत्रकार संजय कोमरपंत हांची धूव समृद्धी कोमरपंत हाणें धावीचे परिक्षेंत 94 टक्के गूण मेळयिल्ले खातीर हे कार्यावळींत ताचोय भावमान केलो.

तेच बरोबर लोकविस्वास प्रतिश्ठानाच्या मोखर्ड हांगासरल्या खासा भुरग्यांच्या शाळेंतले शिक्षक आनी कर्मचारी हांचोय भोवमान केलो. हातूंत अदिती फळदेसाय, राखी नायक, उषा सतरकार, दीपा कुडाळकार, संभवी गायक, किर्ती नायक, मंजिरी पेडणेंकार, पुजा गावडे, शंभवी सालेलकार, प्रकाश वेळीप, डॉ. तनिष्का अमीत शिंदे, सुनिता प्रभू, उल्हास गावडे, सुकोरिना गोम्स, मोहन सतरकार, प्रकाश म्हाळशी, पांडुरंग गांवकार, अतुल देविदास, संकिता नायक, निर्मला गांवकार हांचो आस्पाव आसा.

ह्या वेळार पूर्णा फळदेसाय भगत हांणी मनोगत उक्तायलें. सुरवेक मानेस्तांचे हस्तुकीं लोकमान्य बाळ गंगाधर टिळक हांच्या फोट्याक फुलांहार घालो. ह्या वेळार खासा चलयांनी नाचाची कार्यावळ सादर केली.

येवकार बबेश बोरकार हांणी दिलो. प्रस्तावीक अजीत पैंगीणकार हांणी केलें. कार्यावळीचें सुत्रसंचालन देविदास गांवकार आनी संजय कोमरपंत हांणी केलें. जाल्यार बर्नाड फर्नांडीस हांणी उपकार मानले.