भांगरभूंय | प्रतिनिधी
म्हापशें पालिकेंत आमी करूं ती पुर्वदिशा; बांदकामां सुरू आसात परवान्या बगर
म्हापशें: नगरपालिकेन मालकीच्या बऱ्या प्रकल्पाचें बांदकाम बेकायदो रितीन केलां. फाटल्या खूबशा वर्सां सावन पालिका मंडळ, अधिकारी आनी सरकाराच्या संगनमतान ही अवैद्यशीरपणा सुरू आसात. नुस्तें-मास मार्केट प्रकल्पाचें भोवउद्देशी सभाघर, पालिका प्रशासकी इमारत, पोरणी मामलेदार कचेरी इमारत प्रकल्पा पसून बाजारपेठेंतल्या दुकानांच्या इमारतींचेंय बांदकाम नगरपालिकेच्या बांदकाम परवान्या बगरूच केलां.
पालिका वाठारांत राबयतल्या एखाद्या बांदकाम आराखड्याक उत्तर गोंय नियोजन विकास प्राधिकरणा कडल्यान मान्यताय दितात. उपरांत ह्या प्रकल्पाची निविदा काडटात आनी बोलिदाराक सदर काम हातांत घेवपाक मंजुरी दितात. ह्या मंजुरी बरोबरूच पालिके कडल्यान संबंदीत बांदकामा खातीर बांदकाम परवानो (कन्स्ट्रक्शन लायसन्स) दिवप बंधनकारक आसा. तेन्नाच त्या कंत्राटदाराक बांदकाम सुरू करूंक मेळटा.
पूण सद्या म्हापश्यां नगरपालिकेच्या सुरू आशिल्ल्या प्रकल्पांनी पालिका प्रशासकी इमारती सयत नुस्त्या मार्केटाच्या भोवउद्देशीय सभाघर ही बांदकाम परवान्या बगर बांदतात. परवानो पालिकेच्या अभियंताे विभागा कडल्यान दितात.
पालिका प्रशासकी इमारतीच्या तळ माळ्याचें बांदकाम पुराय जालां. हो 2.97 कोटींचो प्रकल्प आसून डिसेंबर 2021 वर्सा काम सुरू केल्लें.
नुस्तें आनी मास प्रकल्पाच्या दुसऱ्या माळ्यार 3.20 कोटी रुपया खर्च भोवउद्देशी सभाघराचें काम सुरू आसा. फाटल्या 2021 वर्सा ह्या सभाघराचें नवें बांदकाम हातांत घेतलां आनी गोंय नागरी विकास एजन्सीच्या (जीसूडा) माध्यमांतल्यान हो प्रकल्प सुरू आसा. हाचेर 3 कोटी रुपया 15 व्या वित्त आयोगाच्या अनुदानांतल्यान आनी हेर शिल्लक 20 लाख रुपया रक्कम पालिका निधींतल्यान वापरतात.
ह्या मार्केट इमारतीचें जानेवारी 2014 वर्सा उक्तावण जाल्लें. त्याच वर्सा इमारतीच्या दुसऱ्या माळ्यार सभाघराची निविदा काडली आनी कन्स्ट्रक्शन परवान्या सयत कामाची वर्क ऑर्डर दिली. पूण वर्सभरांतूच कंत्राटदारान हें काम सोडलें. ताका लागून फाटलीं 9 वर्सां सभाघराचें काम पुराय जाल्लें ना.
उपरांत फाटल्या 2021 वर्सा नवे निवेदे सयत सद्याच्या कंत्राटदाराचेर जीसूडान काम सोंपयलें. पूण ते खातीर कन्स्ट्रक्शन लायसन्स पालिके कडल्यान घेतिल्लें ना. पालिकेन ह्या बांदकामाक 2014 वर्सा परवानो दिल्लो. एखाद्या रखडिल्ल्या बांदकामाचो कन्स्ट्रक्शन परवानो दर तीन वर्सांनी नुतनीकरण करचो पडटा. ते खातीर परतून आराखड्याची नगर नियोजन विकास प्राधिकरणा कडल्यान (पीडीए) मंजुरी मेळोवची पडटा. पूण जीसूडा कडल्यान अजून मेरेन तीन फावटी ह्या रखडिल्ल्या बांदकामाच्या बांदकाम परवान्याचें नुतनीकरण करूंक जाय आशिल्लें. पूण तें करिनासतनाच इमारतीच्या दुसऱ्या माळ्याचें बांदकाम जीसूडान हातांत घेतलां.
पालिकेन पोरण्या मामलेदार कचेरेच्या इमारतीचे सुवातेर वेपारी प्रकल्प उबारपाची निविदा काडून वर्क ऑर्डर दिल्या. अजून ह्या प्रकल्पाचें बांदकाम कंत्राटदारान सुरू केल्लें ना. पूण ह्या प्रकल्पा खातीर लेगीत पालिके कडल्यान कन्स्ट्रक्शन लायसन्स दिल्लें ना. देशाच्या स्वातंत्र्य दिसाच्या महोत्सवाचें औचित्य सादून सरकारान दिल्ल्या 1 कोटी रुपयांच्या निधींतल्यान हो प्रकल्प उबो रावतलो.
10 वर्सां पयलीं भाजी मार्केट प्राकारांतल्या चण्यांच्या भट्टींचो वयलो माळो (ए ब्लॉक) आनी भाजी मार्केटाचे फाटले इमारतीचो वयलो माळो (सी ब्लॉक) ह्या दोनूय इमारतींचें बांदकाम पालिकेन स्वता केल्लें. त्या वेळार लेगीत कंत्राटदाराक ह्या बांदकामा खातीर बांदकाम परवानो दिवंक नाशिल्लो. ह्या दोनूय माळ्यांचें बांदकाम किसकर नांवाच्या कंत्राटदारान अर्द्यारूच सोडिल्लें आनी हे ब्लॉक हस्तांतरीत करूंक नाशिल्ल्यान हे माळें अर्दकुटे स्थितींत पडून आसात. तरी लेगीत सद्या पालिकेन पाख्यार सौर उर्जा दिवपी सोनल पॅनल उबारल्यात.
सद्याचें तशेंच फाटलें पालिका मंडळ, पालिका अधिकारी आनी जीसूडाच्या अधिकाऱ्यां वतीन म्हापशें नगरपालिके वतीन हो नगरपालिका कायद्याच्या उल्लंघनाचो प्रकार चलयला. पालिकेची मालमत्ता आशिल्ल्यान आमी कितेंय करूं ती पुर्वदिशा हीच पालिका मंडळ आनी पालिका अधिकाऱ्यां मदीं निर्माण जाल्या. ताका लागून हालींच पे पार्किंगेचे सुवाते संबंदीची अधिसुचोवणी काडचे पयलींच पालिका मंडळान थंय पे पार्किंगेचो दर निश्चीत केल्लो.
बाजारपेठेंतल्या नुस्तें आनी मास प्रकल्प इमारतीचो अंशता भोगवटा परवानो जीसूडान दिला. ह्या परवान्या प्रमाण हातूंत नुस्तें आनी चिकन, मटण विक्रेत्यांक घेतल्यात. पूण सद्या जीसूडान ह्या प्रकल्पाच्या आराखड्यांत गरजेचे बदल करिनासतनाच बेकायदेशीरपणान इमारतीचीं जनेलां आनी दारां बंद करपाचें सत्र सुरू केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
