भांगरभूंय | प्रतिनिधी
भांगरभूंय । प्रतिनिधी
म्हापशें ः पिर्णा गांवांतलीं तीन देवळां फोडपाची घडणूक मंगळारा उक्ताडार आयलीं. चोरांनी देवळांच्या मुखेल दाराचें कुलूप तोडून भितर प्रवेश केलो आनी फंडपेटयेंतले सुमार 9 हजार रुपया चोरले. हीं तिनूय देवळां दोनशें मिटरांच्या अंतराचेर आसा.
चोरांनी श्रीकेळंबिका देवस्थान, श्रीविठ्ठल देवस्थान आनी श्रीपांडुरंग देवस्थान ह्या तिनूय देवळांनी चोरी केली. आयज सकाळीं 8.30 च्या सुमाराक भटजीक चोरी जाल्ल्याची कळटांची तांणी रोखडीच हे घडणुकेची म्हायती देवस्थान समितीक आनी उपरांत कोलवाळ पुलिसांक दिली. चोरांनी केळंबिका देवळांतले फंडपेटयेंतल्यान सुमार 5 हजार रुपया जाल्यार हेर दोनूय देवळांतल्यान दरेकी 2 हजार रुपया चोरल्यात असो दुबाव समितींनी उक्तायला. ह्या देवळांतलीं भांगरां वा हेर मोलादीक वस्तू चोरूंक नात.
पुलिसांनी पंचनामो केलो तशेंच श्वान पंगड आनी तज्ञांचो वापर केलो. श्री केळंबिका देवळांत सीसीटीव्ही कॅमेरे आसात. पुलीस कॅमेर्याचे फुटेजी वरवीं चोरयेचो तपास करतात. फुडलो तपास निरीक्षक विजय राणे सरदेसाय हांच्या मार्गदर्शना खाला पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
