भांगरभूंय | प्रतिनिधी
फोंडें: गांजे- उसगांवां जावपी करोडांनी रुपयांचो 25 एमएलडी उदक शुद्धीकरण प्रकल्प फुडाराक 5 पंचायत वाठारांतल्या लोकांक फायद्याचो थारतलो. हो प्रकल्प डिसेंबर मेरेन पुराय करपाचो यत्न बांदकाम खात्यान सुरू केला. उपरांत उसगांव, धारबांदोडें, वळवय, केरी आनी वेरें-वाघुर्में पंचायत वाठारांतल्या उदकाचो प्रस्न कायमचो सुट्टलो.
गांज्यां बांदकाम खात्या वतीन प्रकल्पाचें काम कांय वर्सां सावन सुरू आसा. ही सुवात मेळोवपाक कळाव जाल्ल्यान प्रकल्प आडखळून उरिल्लो. पूण सध्या ह्या प्रकल्पाचें काम झुंजा पांवड्यार चालू आसा आनी डिसेंबरांत तें सोंपतलें. बांदकाम खात्याच्या कार्यालयांतल्यान मेळिल्ले म्हायती प्रमाण, डिसेंबर मेरेन काम पुराय जातलें. पूण प्रत्यक्षांत प्रकल्पाची पळोवणी केल्यार ताचें लोकार्पण लांबणेर पडपाची शक्यताय आसा.
म्हादय न्हंयचेर उदकास्रोत खात्यान बॅरेज उबारून उदक सांठोवपाची तयारी केल्या. तशेंच उदक पंप बसोवन ओपा जलशुद्धीकरण प्रकल्पा खातीर कितलींशींच वर्सां जालीं सोडटात. बांधकाम खात्यान कांय दिसां सावन गांजे हांगाच्यान पाळी, सुर्ला आनी वेळगें पंचायत वाठारांत लोकांक उदकाची पुरवण करपाक सुरवात केल्या. सुमार 10 कोटी रुपया खर्च करून मुख्यमंत्री डॉ. प्रमोद सावंत हांणी उक्तावण केल्लो पंप तीन दिसांनीच उदकांत कोसळिल्ल्याची घडणूक घडली. सध्या दुरुस्तीचें काम सुरू आशिल्ल्यान फुडल्या काय दिसांनी तिनूय पंचायत वाठारांनी सुरळीत उदकापुरवण जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
