भांगरभूंय | प्रतिनिधी
आप्रामेंतवाडो, वेर्ला घडलो प्रकार
दोनूय कुटुंबां आड गुन्यांव नोंद
म्हापशें: माकडान झाडा वयल्यान घराचेर उडी मारिल्ल्याच्या कारणा वयल्यान शेजाऱ्यां मदीं मारपेट जाली. ह्या प्रकरणांत म्हापशें पुलिसांनी दोनूय कुटुंबां आड गुन्यांव नोंद केला.
आप्रामेंतवाडो, वेर्ला हांगा सोमारा सकाळीं 8.15 वरांचेर हो प्रकार घडलो. भाईडकार आनी सुतार कुटुंबां मदीं आदली दुस्मानकाय आसा. कागाळदार संकेत भाईडकार हांचे मालमत्तेंतल्या झाडा वयल्यान कागाळदार सोनाली सुतार हांच्या घराचेर माकडान उडी मारली.
हाका लागून सुतार हांच्या घराच्या पाख्या वयले सिमेंटाचे पत्रे फुटले. हाची जाप सुतार कुटुंबान भाईडकार कुटुंबाक विचारली. हाचे वयल्यान दोनूय कुटुंबां मदीं गाळी संवून मारपेट जाली. हातूंत संकेत भाईडकार, शांबा भाईडकार आनी सोनाली सुतार आनी भरत सुतार हे चार जाण जखमी जाले. जखमींचेर म्हापशेंच्या जिल्हो हॉस्पिटलांत उपचार केले.
ह्या प्रकरणांत म्हापशें पुलिसांनी संकेत भाईडकार, स्मृती भाईडकार, सिद्धी भाईडकार, शांबा भाईडकार, लक्ष्मण सुतार, आकाश सुतार, भरत सुतार आनी सोनाली सुतार हांचे आड भादंसंच्या 447, 324, 504, 506(2) कलमा खाला गुन्यांव दाखल केला.
मजगतीं, हाचे पयलीं भाईडकार हांचे मालमत्तेंतलें एक झाडूय सुतार हांच्या घराचेर पडून लुकसाण जाल्लें. दुर्घटणा घडचे पयलीं झाड मारचें अशी सुतार कुटुंबाची मागणी आशिल्ली. पूण झाड मारूंक नाशिल्ल्यान दोनूय कुटुंबां मदलो वाद तेंगशेक पाविल्लो.
फुडलो तपास सहाय्यक उपनिरिक्षक दिगंबर कांबळी आनी हवालदार उमेश नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
