भांगरभूंय | प्रतिनिधी
दुबावीत श्याम नायक हाका अटक
मडगांव: नेसाय उद्देगीक वसणुकेंत कामा निमतान आयिल्ल्या झारखंडांतलो राजीव मोहातो ह्या कामगाराचो खून जावपाची घडणूक काल (सोमारा) घडली. मायणा कुडटरी पुलिसांनी रोखडोच गुन्यांव नोंद केला. ह्या खून प्रकरणांत दवर्लेच्या श्याम नायक हाका अटक केल्या.
मूळ झारखंडचो आनी सद्या नेसाय उद्देगीक वसणुकेंत कामगार म्हूण काम करपी राजीव मोहातो हाची कूड सांपडली. राजीव हाचे कुडीचेर, तोंडाचेर आनी मानेर वार केल्ल्याचें दिसून येतालें. ताका लागून हो खून आसपाची शक्यताय आसा.
ह्या प्रकरणांत मायणा कुडटरी पुलिसांनी गुन्यांव नोंद करीत तपासाक सुरवात केली. तपासा मजगतीं, दवर्ली हांगासरल्या श्याम नायक हाचे कडेन शाब्दीक वाद जाल्ल्याची म्हायती पुलिसांक मेळ्ळी. ते प्रमाण मायणा कुडटरी पुलिसांनी पळून वचपाचे तयारेंत आशिल्ल्या दुबावीत श्याम नायक हाका ताब्यांत घेतलो.
चवकशे उपरांत मायणा कुडटरी पुलिसांनी दुबावीत श्याम नायक हाका अटक केल्या. पुलीस अजून लेगीत नेमक्या खंयच्या कारणा खातीर राजीव हाचो खून जालो हाचो तपास करतात.
मेळिल्ले म्हायती प्रमाण श्याम नायक आनी राजीव मोहातो हे दोगूय सोमारा फांतोडेर मेरेन सोरो पियेत बशिल्ले. तांचे मदीं गोंयकार आनी गोंया भायलो ह्या विशया वयल्यान वाद जालो. ते दोगूय सोऱ्याचे घुंवळेंत आसतनाच श्याम नायक हाणें ग्लासाच्या आदारान राजीवाक मारपेट केली. तातूंत राजीवाचे तकलेर आनी मानेर घाव बसले आनी रक्त व्हांवूंक लागलें. हातूंतच ताका मरण आयलें.
उपरांत पळून वचपाचे तयारेंत आसतना दुबावीत श्याम नायक हाका पुलिसांनी ताब्यांत घेतलो. ह्या प्रकरणाचो फुडलो तापस मायणा कुडटरीचे पुलीस निरिक्षक अरूण देसाय हांच्या मार्गदर्शना खाला सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
