भांगरभूंय | प्रतिनिधी
आक्रमक नुस्तेकारांनी काम बंद करपाक लायलें
म्हापशें : म्हापशेंच्या नुस्तें मार्केटाचें एक प्रवेश दार पक्कें बांदकाम करून बंद करपाचो यत्न जीसुडाच्या कंत्राटदारान केलो. हाका नुस्तें विक्रेत्यांनी आक्षेप घेवन नेटान विरोध केलो. ताका लागून हें काम रोखडेंच थांबयलें.
ही घडणूक सोमारा सकाळीं 9.30 सुमाराक घडली. ह्या कामा संबंदी जीसुडान आमकां विस्वासांत घेवंक ना. संवादाच्या उणावाक लागून अशें घडिल्ल्याचो दावो पालिका मंडळान केलो.
नुस्तें मार्केटाच्या दोन मजली इमारतीचे दुसरे माळयेर गोंय नागरी विकास एजन्सी वतीन भोव उद्देशी सभाघराचें बांदकाम चालू आशिल्ल्यान हें काम पुराय जावपाक आयलां. हे माळयेर वचपा खातीर लिफ्ट उबारपा खातीर नुस्तें बाजाराचें हें फाटले वटेनचें प्रवेशदार बंद करून ते सुवातेर ही लिफ्ट उबारपाचो निर्णय कंत्राटदारान घेतिल्लो. ते प्रमाण तांणी सोमारा हें प्रवेश दार काँक्रिटाची वणट उबारून बंद करपाचें काम हातांत घेतलें. हें कळटांच नुस्तें मार्केटाच्या विक्रेत्यांनी ह्या कामाक आक्षेप घेवन कंत्राटदाराक काम बंद उडोवपाक लायलें.
हें प्रवेश दार बंद जाल्यार नुस्तें मार्केटाची परिस्थिती एका गोदांवां वरी जातली. पालिकेक हें दार बंद करपाचें आसल्यार आमकां मार्केटाच्या भायर रस्त्यार जागो दियात. आमी भायर बसून वेवसाय करतां. अशें करूंक ना जाल्यार कशेंच हें प्रवेश दार बंद करपाक दिवचे ना, असो निर्णय नुस्तें विक्रेत्यांनी घेतला.
म्हापशें नुस्तें विक्रेता संघटणेची अध्यक्ष शशिकला गोवेकार हांणी पालिका आनी जीसूडाच्या कामाचेर प्रस्न उक्तायला. मुळांत इमारती खातीर लिफ्टीचो जागो नियोजीत आसा. थंय ही लिफ्टीची वेवस्था करची. नुस्तें मार्केटाचें हें मुखेल प्रवेश दार. हांगच्यान गिरायकां, विक्रेते यो- वच करतात. हें दार बंद केल्यार आमच्या वेवसायाचेर परिणाम जातलो अशें सांगून तिणें तें बंद करपाक विरोध आशिल्ल्याचें कळयलें.
सध्या नुस्तें मार्केटांत गिरायकां उणीं आसात. मार्केटा भायर शारांत सगळे कडेन नुस्ते विक्रेते नुस्तें विकपाक बसतात. तांकां ह्या मार्केटांत आसपाव घेवचें.अशें निवेदन पालिकेक दिलां. पूण ताचे कडेन पालिकेन आडनदर केल्ल्याचें गोवेकार हांणी सांगलें.
हे विशीं पालिका मंडळ चवकशी करता
जीसुडा खाला नुस्तें मार्केटाच्या दुसर्या मजल्याचें काम सुरू आसा. जीसुडा आनी कंत्राटदारां मदीं सारकें उलोवप जावंक नाशिल्ल्या अशें घडलें. हाची पालिकेक कल्पना नासली. संबंदीत कंत्राटदाराक काम बंद करपाची सुचवणी दिकेल्या. हे विशीं पालिका मंडळ चवकशी करता अशें नगराध्यक्ष प्रिया मिशाळ हांणी सांगलें.
नुस्ते मार्केट इमारतीचो तळ आनी पयल्या मजल्याचो ताबो सध्या पालिके कडेन आसा. दुसर्या मजल्याचें बांदकाम जीसुडाचे सुवादीन केलां. अशें आसून लेगीत पालिकेचे इमारतीचें काम जीसूडान तळ माळयेचें प्रवेश दार बंद करपाचें काम हातांत घेतलें. म्हापशें पालिकेन हाची आपल्याक कल्पना नाशिल्ल्याचें सांगून हात वयर केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
