भांगरभूंय | प्रतिनिधी
भांगरभूंय । खबरां संस्था
मुंबय : जयपूर एक्स्प्रेस रेलगाडयेंत आयज फांतोडेर ५ वरांचेर एक भिरांकूळ घडणूक घडली. रेल्वे सुरक्षा जवान चेतनकुमार चौधरी हाणें आपलो सहायक वांगडी एएसआय टीकाराम मिना सयत चार प्रवाशांचेर फारपेट केलो. त्या चवगांकूय मरण आयलां. उडी मारून पळून गेल्ल्या चेतनाक बोरीवली स्टेशना मजगतीं धरलो.
ही रेलगाडी राजस्थानांतल्यान महाराष्ट्रांतल्या पालघरांत दाखल जातांच ही घडणूक घडली. तातूंत कांय प्रवासी जखमी जाल्ल्याचीय म्हायती मेळ्ळ्या. म्हायती मेळटांत जीआरपी पुलीस आनी आरपीएफ पुलीस घडणुके सुवातेर दाखल जावन तांणी तपासकाम केलें.
वापीच्यान बोरीवली, मीरा रोड स्टेशना मजगतीं ही घडणूक घडली. मरण आयिल्ल्या चारूय जाणांच्यो कुडी फुडले तपासणे खातीर कांदिवलीच्या शताब्दी रुग्णालयांत धाडल्यात.
चेतन हाका मानसीक ताण आशिल्ल्यान तो अस्वस्थ आशिल्लो. हालींच तो सुटयेवेल्यान परतल्लो. चेतन आनी एएसआय टिकाराम हांचे मदीं कसलेंच झगडें जावंक नाशिल्लें. मानसीक ताणाक लागून ताका जो कोण मुखार दिसलो ताचेर ताणें फारपेट केलो. आरोपी चेतन मात्सो रागीश्ट सभावाचो. ताचें मानसीक संतूलन इबाडिल्ल्यान ही घडणूक घडली, अशें आरपीएफचे वरिश्ठ अधिकारी प्रवीण सिन्हा हांणी स्पश्ट केलें. आरोपीची चवकशी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
