भांगरभूंय | प्रतिनिधी
कोसळिल्लें पालसण काडलें कुशीक
पणजी: कॅसलरोक-करंझोळ रेल्वे ट्रॅक मूळ पदार आयला. कोसळिल्लें पालसण कुशीक काडले उपरांत ट्रॅकाची चांचणी लेगीत पुराय जाली. पालसण कोसळ्ळे उपरांत ब्रागांझा घांट विभागांतल्या कॅसलरॉक आनी करंझोळ स्टेशनां मजगतीं कांय रेल्वे सेवा रद्द केल्ल्यो.
दुदसागर ते कॅसरलॉक मजगतचें करंझोळ रेल्वे स्टेशनाच्या ब्रागांझा घांटांत दक्षीण-अस्तंत रेल्वेच्या मार्गार पालसण कोसळिल्ल्यान ह्या मार्गा वयली रेल्वे सेवा कोलमडिल्ली.
कांय रेल्वे गाडयो 29 जुलय मेरेन रद्द केल्ल्यो, जाल्यार निझामुद्दीन एक्स्प्रेस आनी जसिदीह एक्स्प्रेस ह्यो रेल्वे गाडयो वळेरेन बेळगांव आनी लोंढा ह्या रेल्वे स्टेशनां वयल्यान चालू दवरिल्ल्यो. ह्या गाडयांची वास्को ते बेळगांव वा लोंढा ही येरादारी बंद दवरिल्ली. तेच प्रमाण वास्को ते कचेगुडा (कर्नाटक) ह्या मार्गा वयली शालीमार एक्स्प्रेस ही रेल्वे हुब्बाळ्ळी सावन कचेगुडा मेरेन चालू दवरिल्ली.
रेल्वे मार्गार पडिल्लें पालसण कुशीक काडून रेल्वे मार्ग आनी सेवा परतून सुरू दवरपा खातीर झुजा पांवड्यार यत्न चालू आसले तरी अर्द्या परस चड बोगदो बंद जातलो इतलें पालसण कोसळपाचें प्रमाण आशिल्ल्यान रेल्वे सेवा परतून सुरू जावपाक थोडो वेळ लागलो, असो अदमास दक्षीण-अस्तंत रेल्वे अधिकाऱ्यांनी उक्तायिल्लो. पूण आतां कॅसलरॉक-करंझोळ रेल्वे ट्रॅक मूळ पदार आयलां. पालसण कोसळ्ळे उपरांत रुळाची एक चांचणी पुराय जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
