भांगरभूंय | प्रतिनिधी
धारबांदोडे पंचायत सरकाराक निवेदनां दितली
फोंडें : पंचायतीच्या जाग्यार उपजिल्होधिकारी कार्यालय उबारल्या उपरांत पंचायतीक हे कडेन जागो दिवपाचें तशेंच हेर जायतीं आस्वासनां आजूनय पुराय जावंक ना. हे इमारतींत खुबशीं कार्यालयां सुरू केल्यांत. सरकारान पंचायतीक दिल्लें आस्वासन पुराय करपा खातीर विवीध खात्यांक निवेदनां दिवपाचो थाराव आयतारा दिल्ल्या धारबांदोडेंचे ग्रामसभेंत घतलो.
सरपंच बालाजी उर्फ विनायक गांवस हांचे अध्यक्षते खाला ग्रामसभा जाली. ह्या वेळार आदली सरपंच स्वाती गांवस तिळवे, सचीव लक्ष्मण खुटकार, पंच महेश नायक आनी हेर पंच वांगडी हाजीर आशिल्ले.
उपजिल्होधिकारी कार्यालय इमारत बांदचे पयलीं सरकारान हेर कडेन 4 हजार चौखण मिटर जमीन घेवन पंचायतीक दिवपाचें उतर दिल्लें. तशेंच इमारतींतल्या कार्यालयांत जाय आशिल्ले कामगार आनी एक कार्यालय पंचायतीक दिवपाचें थारायल्लें. पूण वर्सां उलगलीं तरीय पंचायतीक जागो उपलब्ध करून दिवंक ना. आयतारा ह्या विशयाचेर चर्चा करून सरकाराक आश्वासनाची याद करून दिवपा खातीर निवेदन दिवपाचो थाराव ग्रामसभेंत घेतलो.
ह्या पंचायत वाठारांतल्या शेटीमळ गांवांत पोरण्या पांख्या खाला सोर्याचो कारखानो स्थापन करपाची प्रक्रिया सुरू आसा. हे विशीं ग्रामसभेंत चर्चा जाली. सोर्याच्या कारखान्याक विरोध ना. पूण कारखान्यांत 95 टक्के थळाव्या कामगारांक प्राधान्य दिवपाची गरज गांवकारांनी उक्तायली. ते प्रमाण ग्रामसभेंत थाराव घेतला.
सरपंच बालाजी गांवस हांणी उपजिल्होधिकारी कार्यालय इमारतींत खुबशीं सरकारी कार्यालयां सुरू केल्यांत. पूण थळाव्या पंचायत वाठारांतल्या कामगारांक हातूंत आस्पावन घेवंक ना. तशेंच पंचायती खातीर जागो दिवपाचें आस्वासन पुराय जावंक नाशिल्ल्यान संबंदीत खात्याच्या अधिकार्यांक निवेदनां दिवपाचो थाराव ग्रामस्थांनी घेतिल्ल्याचें सांगलें.
शेटीमळ हांगा सोरो निमारण करपी कारखान्यांत 95 टक्के थळाव्यांक नोकरी दिवपाचो यत्न पंचायत मंडळ करता. कारखान्याचें कायदेशीर काम सुरू आशिल्ल्यान तें जाल्यार उपरांत कारखान्याक पंचायत परवानगी दितली अशें सरपंच बालाजी गांवस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
