जुनसवाडो- मांद्र्यां 15 दिसां भितर मसंडभूंय

भांगरभूंय | प्रतिनिधी

सरपंच सावंत हांचें आस्वासन

भांगरभूंय । प्रतिनिधी
पेडणें: मांद्रें ग्रामसभा सरपंच अॅड. अमीत सावंत हांचे अध्यक्षते खाला जाली. हे ग्रामसभेंत भौशीक मसंडभूंय, परंपरीक पांयवाटो, रस्त्यांक पडिल्लीं फोंडकुलां, सांठून उरिल्लें उदक, बेकायदेशीर बांधकामां, पार्कींग वेवस्था, तशेंच गांवांत बिगर गोंयकारां कडल्यान बारीक गाड्यां वरवीं वेवसाय ह्या विशयांचेर चर्चा जाली. सरपंच अमीत सावंत हांणी नागरिकांनी विचारिल्ल्या प्रस्नांक योग्य जापो दिल्ल्यान आनी समस्यांचेर बरे तरेन मार्गदर्शन केल्ल्यान ग्रामसभा सुशेगादीन जाली.
ह्या वेळार उपसरपंच तारा हडफडकार, पंच मिगेल फर्नांडीस, पंच प्रशांत नायक, पंच किरण सावंत, पंच श्रीमती अमरोज, पंचायत सचीव प्रीतम सावंत आनी हेर हाजीर आशिल्ले.
ह्या वेळार भौशीक मसंडभूंय विशीं चलिल्ले चर्चेंत सरपंच सावंत हांणी जाप दितना सांगलें, 15 दिसां भितर मसंडभूंय जुनस वाड्यार उबारतले. हे विशीं प्रक्रिया सुरू जाल्या. मसंडभूंयच्यो कोणाकूच आडखळी आनी त्रास जावचे नात.
जुनशेर फॉरेस्ट पार्क लागसारा जे गाडे आसा ते बिगर गोंयकार चलयतात. फुडाराक हे लोक ल्हान- व्हड वेवसाय गोंयकारांच्या हातांतल्यान घेतले. ताका लागून तांकां फॉरेस्ट पार्क लागसारा प्राधान्य दिवचें न्हय. गांवच्या लोकांनी हे प्रस्न लेखी स्वरुपांत सादर केले. तेन्ना सरपंच अमीत सावंत हांणी हें कोणेंय निदर्शनाक हाडल्यार ताचेर कारवाय जातली अशें सांगलें. थळाव्यांनी आपल्या नांवांचेर परवाने घेवन दुकानां बिगर गोंयकारांक चलोवपाक दिवचीं न्हय. फुडाराक अशें करतना कोणूय दिसल्यार ते स्टॉल खाली करपाची शिटकावणी सरपंचान दिली.
अॅड. प्रसाद शहापुरकार हांणी मदलो माज, मांद्रेंच्या प्रदीप कोरगांवकार हांच्या घरा मेरेन वचपा खातीर पांयवाट उपलब्ध ना. ताका लागून दुयेंत मनशाक हॉस्पिटलांत व्हरतले म्हणल्यार थंय अ‍ॅम्बुलन्स वचपाक शकना. तांकां स्ट्रॅचरीचेर घालून दुयेतींक 100 मिटर पयस हाडचें पडटा. तांचे खातीर पांयवाट वा घरा मेरेन वचपा खातीर रस्तो करपाची मागणी शहापुरकार हांणी केली. तेन्ना रोखडेच हे सुवातेक भेट दिवन, पांयवाटे खातीर जमीन धनया कडेन चर्चा करून हो विशय सोडयतले अशी गवाय अॅड. सावंत हांणी दिली.

ह्या वेळार तुषार गोवेकार, शंकर गोवेकार, जगन्नाथ पार्सेकार, आदले सरपंच विश्वनाथ शिरोडकार आनी हेरांनी विवीध विशयाचेर चर्चा करीत जुनस वाडो मांद्रें हांगा व्हडा प्रमाणांत पार्कींग समस्ये विशीं प्रस्न मांडलो. ज्या हॉटेल वेवसायिकांक वा घरांक, गॅस्ट हावजांक पंचायत परवानो दिता तांकां पार्कींग वेवस्था खंय आसा हे पयलीं पळोवचें आनी मागीरूच तांकां परवाने दिवचे अशें सांगलें. हाचेर अमीत सावंत हांणी सगळे तरेचे परवाने, ना हरकत दाखले संबंदीत खात्या कडल्यान हाडटात. ताचे उपरांत पंचायतींत फायल येता. निमाणें पंचायत ना हरकत दाखलो दित आसता अशें तांणी सांगलें.
मांद्रेंच्या कांय रस्त्यांचेर फोंडकुलां पडल्यांत. पावसा पयलीं हे रस्ते दुरुस्त करूंक ना. आतां तरी ते सारके करचे अशी सुचवणी ग्रामस्थांनी केली. तशेंच उदक सांठून उरिल्ल्यो पांय वाटो मेकळ्यो करून दिवच्यो अशी ग्रामस्थांनी मागणी केली. सरपंच अमित सावंत हांणी आपूण बेगीनूच आमदार आनी बांदकाम खात्याच्या अधिकार्‍यां वांगडा चर्चा करून हो विशय सोडयतलों अशें म्हणलें.
मांद्रे पंचायत वाठारांत कितलीं हॉटेलां, रेस्टॉरंटां, मोबायल टॉवर आसात आनी ह्या टॉवरां कडल्यान महसूल मेळटा? असो प्रस्न केलो तेन्ना सरपंच सावंत हांणी सविस्तर म्हायती दिली.
मांद्रें न्हंय अर्दीच नितळ केल्या ती पुरायेन करची. अशे तरेचो थाराव मांडलो आनी तो सगळ्यांनी मंजूर केलो.
उपसरपंच तारा हडफडकार हांणी उपकार मानले.