आयकरा विशीं ….

भांगरभूंय | प्रतिनिधी

पणजी ः जर पगार 5 लाखां परस उणो आसलो तरीय आयकर रिटर्न फायल करचोच पडटा. तो भरपाची निमाणी तारीक 31 जुलय. आयकर कायद्या प्रमाण ज्या व्यक्तीची वट्ट येणावळ सरकारान थारायिल्ल्या येणावळी परस चड आसता तांकां आयकर रिटर्न भरचो पडटा. फारीक करूंक ना जाल्यार दंड भरचो पडूं येता.
पोरणी कर पद्दत पळयल्यार तुमची वट्ट येणावळ अडेज लाख रुपया परस उणी आसल्यार आयकर भरचो पडना. अर्थीक वर्सा तुमची पिराय 60 वर्सां परस चड आसल्यार, आनी तुमचो पगार 3 लाख रुपयां परस चड आसल्यार आयटीआर भरप गरजेचें आसा. तुमची पिराय 75 वर्सां वयर आसल्यार आनी तुमकां फकत पेन्शन वा बँक व्याजांतल्यान येणावळ मेळटा जाल्यार मागीर तुमकां आयटीआर दाखल करपाची गरज ना. नव्या कर वेवस्थे प्रमाण दरेकाक 2.5 लाख रुपया मेरेन येणावळीचेर कसलोच कर भरचो पडचो ना. ही मर्यादा 2023- 24 अर्थीक वर्सा खातीर 3 लाखां मेरेन वाडयल्या. पगार 5 लाखा परस उणो आसलो तरीय आयटीआर भरचो पडटलो.

जायत्या जाणांचो वर्सुकी पगार पांच लाख रुपया परस उणो आसता. तांचेर कसलोच कर लावचे नात. पूण ह्या लोकांनी आयटीआर दाखल करपाची गरज आसा. कारण 2.5 लाखां वयर पगाराचेर 5% कर काडटात. आयटीआर दाखल करतना तुमकां 87A खाला सवलत मेळटा आनी ती रक्कम परत मेळटा. ही सवलत 12,500 रुपया मेरेन आसा. हाका लागून 5 लाख रुपया मेरेनच्या पगाराक करांतल्यान पुराय सुट मेळटा.

तुमचो पगार 5 लाखां परस चड आसत जाल्यार, पूण सगळो कपात दावो केल्या उपरांत तुमचो कर योग्य पगार 5 लाख रुपया वा ताचे परस उणो जालो जाल्यार लेगीत आयटीआर दाखल करपाची गरज आसा. कारण जेन्ना तुमी आयटीआर दाखल करतले तेन्नाच तुमकां खंयची कपात मेळटली, कितले मेरेन आनी तुमचेर कर लागतलो काय ना तें कळटलें.

समजा तुमचो पगार 4.5 लाख रुपया आसा. जाल्यार तुमकां आयटीआर दाखल करचो पडटलो. आयटीआर दाखल करतना त्याच वेळार तुमकां 2.5 लाख रुपया म्हळ्यार 2.5 लाख रुपया वयर 5% दरान 10 हजार रुपया सवलत मेळटली आनी तुमी कर मुक्त जातले. दुसरे वटेन पगार 5.50 लाख रुपया आसलो तरीय आयटीआर दाखल करचो पडटलो. पूण, ह्या प्रकरणांत तुमचेर कर लागचो ना.