भांगरभूंय | प्रतिनिधी
मुरगांव: वेर्ण्यां दोन मोटार शोरूम फोडून 3 लाख रुपयांची चोरी केल्ल्या प्रकरणांत वेर्णें पुलिसांनी अनवळखी चोरां आड एफआयआर दाखल केला. गोवा मोटर्स, ह्युंदाय शोरुमांतल्यान 2,73,800 रुपयांची रोख जाल्यार वेर्णेंच्या कोस्टल होंडा शोरुमांतल्यान 60 हजार रुपयांची रोख चोरयेक गेल्ल्याचें पुलिसांनी सांगलें.
मजगतीं, ह्या अनवळखी चोरांच्यो हालचाली सीसीटीव्ही कॅमेऱ्यांत कैद जाल्यात. पूण तांणी आपले चेरे पुरायपणान धांपिल्ले दिसून येतात.
मेळिल्ले म्हायती प्रमाण गोवा मोटर्स, ह्युंदाय मोटार शोरुमाचे म्हावेवस्थापक विजय कामत हांणी वेर्णें पुलीस स्टेशनार दिल्ले कागाळे प्रमाण अनवळखी चोरांनी ही चारी 26 जुलयाक रातचीं 7.30 ते 27 जुलय सकाळीं 9 वरां मजगतीं ह्युंदाय शोरुमांत प्रवेश करून केली. भांडार विभागाचे शटर मोडून लुकसाण केलें आनी कॅश बॉक्सांतल्यान 2,73,800 रुपया रोख रकमेची चोरी केली. ह्या प्रकरणांत पुलीस उपनिरिक्षक उत्क्रांतराव देसाय फुडलो तपास करतात.
मजगतीं, दुसरे एके घडणुकेंत वेर्णेंच्या कोस्टल होंडा शोरुमांतल्यान 60 हजार रुपयांची रोख चोरयेक गेल्ल्याची कागाळ कोस्टल होंडा, काकुलो कार्स प्रा. लि.चे उपाध्यक्ष ऑस्कर फर्नांडीस हांणी दिली. दोन अनवळखी चोरांनी इमारतींत प्रवेश केले उपरांत सरवेवस्थापकाच्या कॅबिनाचें जनेल उक्तें करून प्रवेश केलो आनी 60 हजार रुपयांची रोख रक्कम फारायली. ह्या प्रकरणांत पुलीस उपनिरिक्षक यशवंत मणेरकार फुडलो तपास करतात.
वेर्णें पुलिसांनी ह्या प्रकरणांत भारतीय दंड संहितेच्या कलम 454, 457, 427 आनी 380 प्रमाण गुन्यांव नोंद केला. वेर्णें पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
