भांगरभूंय | प्रतिनिधी
पेडणें: पेडणें पुलीस स्टेशनाचे शिमेंत रातच्या वेळार पार्क करून दवरिल्लीं वाहनां चोरयेक वचपाचे घडणुकेंत वाड जाल्या. नाणेरवाडो पेडण्यां एक दुचाकी (जीए 11 एफ 2407) घरा मुखा वेले गॅरेजींत पार्क करून दवरिल्ली. ती काल (शुक्रारा) फांतोडेर चोरून व्हेल्ल्याची घडणूक घडली. हे विशींची कागाळ पेडणें पुलिशेंत केल्या. मजगतीं, फाटल्या आठ दिसां सावन अशीच एक दुचाकी पेडणें शारांतल्यान फारायिल्ली. ताचो अजून तपास लागिल्लो ना.
मजगतीं, पेडणें म्हालांत सद्या व्हड प्रमाणांत गुन्यांव घडत आसात. पूण पुलीस ह्या गुन्यांवांचो तपास लावपाक अपेशी थारल्यात. ताका लागून पुलिसांचे भुमिकेचेर प्रस्न उप्रासत आसून खूबशा घडणुकांचो तपास आसा तसोच आसा. हाका लागून गुन्यांवांनी वाड जायत आसा ही एक हुस्क्याची गजाल जाल्या.
पोरसकडे न्हंयबाग पेडण्यां दोन म्हयन्यां पयलीं रेल्वे पुला कुशीक एके बायलेचे कुडीचे कुडके सांपडले उपरांत एकूच खवदळ पडिल्लो. पूण त्या खुनाचो आयज मेरेन मोपा पुलिसांक वा पेडणें पुलिसांक तपास लावपाक येस आयलें ना. हाका लागून कायदो आनी सुवेवस्थे विशीं दुबाव उक्तायतात. मजगतीं, तोरशेंच्या दोंगराळ वाठारांत अशीच एक बेवारस कूड सांपडिल्ली. ताचोय तपास लागिल्लो ना.
खून केल्ले बायलेचे कुडीचे कांय कुडके शापोरा न्हंयेंत व्हांवून गेल्ले. जाल्यार कांय झोंपांनी पडिल्ले. पुलिसांनी हाची सोद मोहीम थांबायली काय सुरू आसा हें मात अजून कळिल्लें ना. पेडणें पुलीस स्टेशन आनी मोपा विमानतळ पुलीस स्टेशन हांचे शिमेंत येत आशिल्ल्या आनी घडत आशिल्ल्या खूबशा गंभीर गुन्यांवांचो तपास लावपाक दोनूय पुलीस स्टेशनांक अपेस आयिल्ल्याचें चित्र दिसून येता.
तोरशें दोंगराळ वाठारांत एक कूड सांपडिल्ली. हे विशींय पुलिसांनी तपास केल्लो ना. पेडणें पुलीस स्टेशनाचे शिमेंत आशिल्ले ल्हान व्हड गुन्यांव घडत आसात. त्या गुन्यांवांचो तपास लावपाक पुलीस अपेशी थारत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
