भांगरभूंय | प्रतिनिधी
चार जखमी, दोगां दुबावितांक अटक
फोंडें: काराय-शिरोड्यां बिरेस्तारा रातीं सोऱ्याचे घुंवळेंत चार जाणांक मारपेट केल्ल्या प्रकरणांत फोंडें पुलिसांनी अक्षय रमेश नायक आनी रवीकुमार काळू गोसावी (पंडेगाळ, शिरोडें) हांकां अटक केल्या. मारपेटींत गंभीर जखमी जाल्ले शोधन नायक हाचेर हॉस्पिटलांत उपचार सुरू आसात. जाल्यार कार्तीक नायक, जयेश नायक आनी सुजय नायक ह्या जखमींचेर उपचार करून तांकां घरा धाडून दिल्यात.
फोंडें पुलिसांनी दिल्ले म्हायती प्रमाण काराय-शिरोड्यां एका बार्रा भायर बिरेस्तारा रातीं 11 वरांच्या सुमाराक दोन गटांत मारामारी जाली. हातूंत चार जाण जखमी जाले. जखमींक उपचारा खातीर शिरोडेंच्या मुळाव्या भलायकी केंद्रांत दाखल केले.
तातूंतलो गंभीर जखमी जाल्लो शोधन नायक हाका अदीक उपचारा खातीर मडगांवच्या हॉस्पिटलांत दाखल केला. फोंडें पुलिसांनी दुबावितांक अटक केल्या. निरिक्षक तुषार लोटलीकार हांच्या मार्गदर्शना खाला उपनिरिक्षक आदित्य नायक गांवकार ह्या प्रकरणांत अदीक तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
