भांगरभूंय | प्रतिनिधी
गांजें- उसगांवांतल्या नळांक उदक ना
भांगरभूंय । प्रतिनिधी
फोंडें : म्हादय न्हंय भरून व्हांवता तरीय गांजे- उसगांव गांवांतल्या बायलांक उदका खातीर बरेच त्रास सोंसचे पडटात. फाटल्या कांय दिसां सावन नळांक उदक नाशिल्ल्यान आयज ग्रामस्थांनी बांधकाम खात्याच्या अभियंत्यांक जाब विचारलो. सोमार मेरेन नळांक उदक सोडूंक ना जाल्यार मंगळारा गांवांत सुरू आशिल्लें 25 एमएलडी प्रकल्पाचें काम बंद उडोवपाची शिटकावणी ग्रामस्थांनी केली.
गांजें गांवांत फाटल्या कांय दिसां सावन नळांक उदक ना. ताका लागून थळावे सेगीत पडपी पावसाचें उदक वापरतात. तिडकल्ल्या थळाव्यांनी आयज सकाळीं पंपाची दुरुस्ती करपी सुवातेर हाजीर आशिल्ल्या सहाय्यक अभियंते महेश गावणेंकार हांकां जाप विचारली. गांवांतल्या लोकांक म्हादय न्हंयचेर पंप बसोवन उदकाची पुरवण करता. पूण म्हादयचें उदक बुरशें जाल्ल्यान पंप मोडत आसता. ताका लागून गांवच्या लोकांक उदकाची पुरवण जायना.
सरपंच नरेंद्र गांवकार हांणी गांवांत उप्रासिल्ले समस्ये खातीर आपल्या जाग्यार बांय मारून तातूंत पंप बसोवन पुराय गांवांक उदकाची पुरवण करपाचो प्रस्ताव बांदकाम खात्याक दिल्लो. पूण ताची कोणेच आजूनय दखल घेवंक नाशिल्ल्यान हांगच्या लोकांक उदका खातीर तळमळचें पडटा. अभियंता महेश गावणेकार हांणी म्हादय न्हंयेचें उदक बुरशें जाल्ल्यान उदकांत बसयल्लो पंप मोडतूच आसता. शुक्रारा रात मेरेन नवो पंप बसोवन थळाव्यांक उदकाची पुरवण करतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
