मागणी क्षेत्रांक 2050 मेरेन शंभर टक्के पुर्नवापर आदारीत वीज पुरवण : मुख्यमंत्री

भांगरभूंय | प्रतिनिधी

पणजी: सगळ्या मागणी क्षेत्रांक 2050 मेरेन शंभर टक्के पुर्नवापर (Renewable) आदारीत वीज पुरवण करपाचो निर्णय राज्य सरकारान घेतला, अशें मुख्यमंत्री डॉ. प्रमोद सावंत हांणी सांगलें. ते आयज पणजे आयोजीत ‘गोंयच्या उद्देगां खातीर शाश्वत ऊर्जा आनी पर्यावरणीय उपाय’ ह्या विशया वयल्या दोन दिसांचे कार्यशाळेचें उक्तावण केले उपरांत उलयताले.
संयुक्त राष्ट्र उद्देग विकास संघटणा, केंद्रीय सुक्ष्म, ल्हान आनी मध्यम उद्देग मंत्रालय, गोंय राज्य प्रदूशण नियंत्रण मंडळ, गोंय ऊर्जा विकास संस्था आनी संवसारीक पर्यावरणीय सुविधा हांच्या जोड पालवान हे कार्यशाळेचें आयोजन केलां.
मुख्यमंत्र्यान फुडें सांगलें, राज्यांत पुर्नवापर ऊर्जा आनी ऊर्जा कार्यक्षमताय येवजण सुरू करून पर्यटन, येरादारी, भलायकी, उद्देग, कृशी, अन्न प्रक्रिया उद्देग अशा क्षेत्रांत अंमलबजावणी करतले. तशेंच सरकारान उद्देगां खातीर हायड्रोजन धोरण आनी झिरो इमिशन धोरण तयार करपाचें काम सुरू केलां.
मुख्यमंत्र्यान उद्देजकांक कार्यशाळेंत जोड राष्ट्र उद्देग विकास संघटणे वतीन ऊर्जा कार्यक्षमताय तंत्रज्ञाना विणीं करपी शिफारशींची अंमलबजावणी करपाक सांगलें आनी हरीत ऊर्जा अर्थवेवस्थे खातीर सगळी जाय ती मजत करपाचें उतर दिलें.
पर्यावरण मंत्री निलेश काब्राल हांणी सांगलें, हवामान बदलाक लागून राज्य, देश आनी संवसारांतले अर्थवेवस्थेचेर परिणाम जाता. हवामान बदलाक लागून ह्या वर्सा गोंयांत पावसाक उशीर जालो. उद्देगांच्या सहकार्यान गोंयांत झिरो इमिशनाचे उद्दीश्ट 2050 वर्सा पयलीं साध्य जातलें, अशेंय तांणी सांगलें.
जोड राष्ट्र उद्देग विकास संघटणेचे मुखेली डॉ. रेने व्हॅन बरकेल हांणी युनीडो ही संयुक्त राष्ट्राची म्हत्वाची संघटणा आशिल्ल्याचें सांगून संघटणेचे वांगडी आशिल्ल्या विकसीत देशांक उद्देगीक विकास, गरिबी निर्मुलन, जागतीक वेपार आनी पर्यावरणीय शाश्वतताय अशा मळांचेर मजत करता, अशें सांगलें. तशेंच संघटणा सुक्ष्म, ल्हान आनी मध्यम उद्देगांक प्रशिक्षण, कुशळटाय, तांत्रिकी मदत, इनोव्हेशन आनी उत्पादकताय मळार मजत करता, अशेंय तांणी सांगलें.
केंद्रीय सुक्ष्म, ल्हान आनी मध्यम उद्देग मंत्रालयाच्या जीए-टीपी विभागाचे संचालक विनम्र मिश्रा, गोंय राज्य प्रदूशण नियंत्रण मंडळाचे अध्यक्ष महेश पाटील हांचेंय ह्या वेळार भाशण जालें.
गोंय जैवविविधताय मंडळाचे हवामान विभाग मुखेली डॉ. मिशेल फर्नांडीस हांणी येवकार दिलो आनी निमाणें गोंय राज्य प्रदुशण नियंत्रण मंडळाची शास्त्रज्ञ लिविया डिसिल्वा हांणी उपकार मानले.