वर्सभरांत दायज धोरण तयार

भांगरभूंय | प्रतिनिधी

पणजी : सगळ्या आमदारांक विस्वासांत घेवन वर्सा भितर सरकार दायज धोरण तयार करतलें, अशें आस्वासन पुरातत्व मंत्री सुभाष फळदेसाय हांणी दिलें.
आमदार विजय सरदेसाय आनी हेरांच्या खासगी थारावाचेर चर्चा करतना मंत्र्यांनी हे आस्वासन दिलें. उपरांत आमदारांनी खासगी थाराव फांटी घेतलो. गोंय हो पयली संघप्रदेश आशिल्लो. 30 मे 1987 दिसा गोंयाक घटक राज्याचो दर्जो मेळ्ळो. तो मेळ्ळो तरी आजून आदले गोंय, दमण आनी दीव प्रदेशाचे कायदे तशेच आसात. दायज थळांची जतनाय करपा खातीर कायद्यांत बदल करपाची गरज आसा, अशी मागणी आमदार सरदेसाय हांणी केली.
पोरणें गोंयचे चर्च सावन 300 मिटराचेर बेकायदा बांधकाम उबे रावता. ताचे आड खंयचीच संस्था कारवाय करपाक शकना. कारवाय करपा विशीं कायदो जाय, अशी मागणी सरदेसाय हांणी केली.
दायज धोरण जाले उपरांत थळाव्यां लोकांक लाव जातलो. दायज थळांक भेट दिवपाक पर्यटक येतले. हाका लागून थळाव्या वेवसायिकांक धंदो मेळटलो, अशें आमदार कार्लोस फेरेरा हांणी सांगलें.
खाजन शेतीक 3 हजार वर्सां जाल्यां. बांद, मानस आनी खाजन जमीन हांचो दायजांत आसपाव जावपाक जाय, अशी मागणी आमदार वेंझी व्हिएगस हांणी केली. विरोधी पक्ष फुडारी युरी आलेमाव आनी क्रुज सिल्वा हांणीय थारावाक तेंको दिलो.