भांगरभूंय | प्रतिनिधी
भांगरभूंय । खबरां संस्था
कोलकाता : अस्तंत बंगालांत एक धक्को दिवपी गजाल घडल्या. एका जोडप्याक इस्टाग्रामाचेर रील करपाचें पिशें लागिल्लें. त्या नादान तांणी आपल्या 8 म्हयन्यांच्या भुरग्याक विकलो. तांचे कडेन पयशे नाशिल्ले आनी तांकां रील करपा खातीर आयफोन 14 घेवपाचो आशिल्लो. देखून तांणी स्वताचें भुरगेंच विकलें.
ही घडणूक उत्तर 24 परगणा जिल्ह्यांतली. पुलिसांनी भुरग्याचे आवयक अटक केल्या. ही घडणूक उक्ताडार येतकच पुराय वाठारांतल्या लोकांनी तशेंच सोशल मिडियाचेरूय लोकांनी तिडक उक्तायल्या. शेजार्यांक भुरगें घरांत दिसूंक नाशिल्ल्यान तांणी तें खंय आसा हें जाणून घेवपाचो येत्न केलो. मजगतीं, ह्या जोडप्याच्या वागणुकेंत जाल्लो बदल पळोवन तांकां दुबाव आयलो. शेजार्यांनी भुरग्याची चवकशी केली तेन्ना, जोडप्यान पयशांच्या बदलाक चलो विकिल्ल्याचें कबूल केलें.
तांणी पुलिसांक खबर दिली. उपरांत आवय- बापायक अटक जाली. खारदह वाठारांतले एके बायले कडेन हो भुरगो सांपडलो. ह्या जोडप्यान चलो मोबायल फोन घेवपा खातीर प्रियंका नांवाचे हे बायलेक विकिल्लो. पुलिसांनी तिकाय अटक केल्या.
नगरसेवक तारक गुहा हांच्या म्हणण्या प्रमाण, हें जोडपें आपले सात वर्सांचे धुवेकूय विकपाचें आशिल्लें. चल्याक विकल्या उपरांत शेनवारा रातच्या वेळार चलयेकूय विकपाचो जयदेव हांणी यत्न केलो. आमकां हें कळटांच आमी हाची म्हायती पुलिसांक दिली. पुलिसांनी जयदेवाक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
