भांगरभूंय | प्रतिनिधी
मडगांव: ट्रकाच्यो बॅटरी चोरपी दोगां दुबावितांक मडगांवां लोकांनीच धरून पुलिसांचे सुवादीन केले. दोगूय तरणाटे हे वास्को वाठारांतले आसून बॅटरी घेवन बशींत चडटना थळाव्या ट्रक चालकांनी तांकां धरले. ह्या प्रकरणांत फातोड्डें पुलीस सांजवेळा उसरां तपास करताले.
मेळिल्ले म्हायती प्रमाण मडगांव आनी फातोड्डें सयत दक्षीण गोंयच्या विवीध वाठारांनी दर दिसा ट्रकाच्यो बॅटऱ्यो चोरपाचे प्रकार घडत आसात. बिरेस्तारा सांजवेळा माडेल फातोड्डें वाठारांत पार्क केल्ल्या ट्रकाच्यो वेल्डींग केल्ल्यो दोन बॅटऱ्यो चोरांनी तोडिल्ल्यो. तातूंतली एक बॅटरी ट्रका कुशीक सोडून दोगूय दुबावीत कोलवा सर्कला कुशीच्या कामत हॉटेला कडेन बशींत चडटाले.
माडेल हांगासरल्या ट्रक चालकांनी ह्या दुबावितांक बॅटरी घेवन बशींत चडत आसतनाच धरले. उपरांत फातोड्डें पुलिसांक हाची म्हायती दिली. पुलिसांनी चोरयेचे बॅटरी सयत दोनूय दुबावीत चोरांक ताब्यांत घेवन तपास सुरू केला.
माडेलांतले ट्रक चालक बरहान शेख हांणी दिल्ले म्हायती प्रमाण फाटल्या दोन वर्सांत ट्रकां खातीर 32 बॅटऱ्यो घेतिल्ल्यो. फाटल्या कांय दिसांत ट्रकाच्यो सुमार स बॅटऱ्यो चोरल्यो. पुलिसां कडेन कागाळ केल्यार उक्तडार ट्रक पार्कींग करीत जाल्यार कारवाय कशी करतले अशे प्रस्न करतात.
सांवड्ड्यां फाटल्या सपत्कांत एकेच रातीं धा ट्रकाच्यो बॅटऱ्यो चोरिल्ल्यो. तेच प्रमाण हावसींग बोर्ड, मडगांव वाठारांत एकाच दिसा दोन ते तीन बॅटऱ्यो चोरयेक वतात. मारवाडी वेपारी चोरयेच्यो बॅटऱ्यो तीन ते चार हजार रुपयांक विकते घेतात. ताका लागून ट्रकाच्यो बॅटऱ्यो चोरी करपा फाटलें मोटें रॅकेट आसपाची शक्यताय शेख हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
