भांगरभूंय | प्रतिनिधी
दत्तवाडी – म्हापश्यां घडलो प्रकार
म्हापशें: दत्तवाडी म्हापश्यां सावित्री इमारतीचो घातक जाल्लो राखणे वण्टीचो भाग बिरेस्तारा कोसळ्ळो. ह्या राखणे वण्टी विशीं पालिका मुख्याधिकारी आनी उपजिल्होधिकाऱ्याक निवेदन सादर केले उपरांत कांय वरां भितरूच ही वणत पडली.
वयले इमारतीची राखणे वणत जीर्ण जावन मोडकुळेक आयल्या. सद्या पडपी पावसाक लागून महाबळेश्वर पार्सेकार हांच्या घराक हे वण्टी पसून घात निर्माण जाला.
हाका लागून पार्सेकार हांणी बिरेस्तारा 26 वेर पालिका मुख्याधिकारी, बार्देसचे उपजिल्होधिकारी आनी मामलेदार हांकां निवेदन सादर केलें. सावित्री इमारतीच्या ह्या घातक जाल्ले राखणे वण्टीचो प्रकार नदरेक हाडून कसलीय मोटी दुर्घटणा घडचे पयलीं गरजेची ती कारवाय करपाची मागणी महाबळेश्वर पार्सेकार हांणी केल्या.
ह्या निवेदना उपरांत कांय वरां भितरूच जीर्ण जाल्ले फातराचे वण्टीचो कांय भाग कोसळ्ळो. वण्टीचो कोसळिल्लो भाग उण्या उंचायेचो आशिल्ल्यान पार्सेकार हांच्या घराचें लुकसाण जालें ना. पूण वण्टीचो सकयलो भाग कोसळ्ळ्यार पार्सेकार हांच्या घराक घात निर्माण जावपाची शक्यताय आसा. हे खातीर ही वणत रोखडीच मोडून जावपी दुर्घटणा टाळची अशी मागणी पार्सेकार हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
