भांगरभूंय | प्रतिनिधी
म्हापशें: सुकूर गिरी हांगासरल्या राष्ट्रीय म्हामार्गा कुशीचें सेरुला कोमुनिदादीचे सुवातेंत सुरू आशिल्लें बेकायदो बांदकाम बार्देस मामलेदारान बंद उडयलें. ह्या बेकायदो बांदकामाचो खटलो उपजिल्होधिकाऱ्या कडेन सुरू आसून लेगीत संबंदितान बांदकाम सुरूच दवरिल्लें.
बिरेस्तारा दनपारां मामलेदार प्रवीण गांवस आनी अव्वल कारकून शैलेश कोठावळे हांचे नदरेक हो प्रकार येतकूच तांणी हें पक्क्या स्वरुपाचें बांदकाम बंद उडयलें.
सेरुला कोमुनिदादीच्या सर्वे 82/4 सुवातेंत सुकूर गिरी हांगा म्हामार्गाचे कुशीचे शेत जमनींत मातयेचो भराव घालून पत्र्यांचे बांदकाम केल्लें. ह्या बेकायदो बांदकामा आड पंचायत तलाठ्यान उपजिल्होधिकारी न्यायालयांत हरी पेडणेंकारा आड खटलो दाखल केल्लो. ह्या खटल्याची सुनावणी सद्या उपविभागीय दंडाधिकाऱ्याच्या न्यायालयांत सुरू आसा.
तरी लेगीत संबंदितान हे सुवातेंत वेवसाय करपाच्या उद्देशान पक्के बांदकाम सुरूच दवरिल्लें. बिरेस्तारा सिमेंट काँक्रिटाच्या आदारान ह्या जमनीचें सपाटीकरण करताले.
हो प्रकार नदरेक येतकूच मामलेदारान हें काम बंद उडयलें आनी संबंदितांक तंबी दिली. हे विशींचो अहवाल मामलेदारा कडल्यान उपजिल्होधिकाऱ्याक सादर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
