भांगरभूंय | प्रतिनिधी
सुमार अडेज लाखाचें लुकसाण
मामलेदार, पंचायत मंडळान केली पळोवणी
दिवचल: सांखळी मतदारसंघांतल्या जोशींभाट सुर्ला वाठारांतल्या निलेश सातोडकार हांचें रावतें घर पावसाक लागून कोसळिल्ल्यान सुमार अडेज लाख रुपयांचें लुकसाण जाल्ल्याची म्हायती दिली.
ह्या वेळार मामलेदार राजाराम परब, तलाठी शाबी फोंडेंकार, सरपंच विश्रांती सुर्लकार, थळावे पंच सुभाष फोंडेंकार, शाणू सुर्लकार, बाबलो नाटेकार हांणी घराची पळोवणी केली.
मेळिल्ले म्हायती प्रमाण जोशींभाट सुर्ला हांगाच्या निलेश सातोडकार हांचें रावतें घर बिरेस्तारा रातीं व्हड प्रमाणांत पावस पडिल्ल्यान पुराय कोसळिल्ल्यान तांचें बरेंच लुकसाण जालां. तांचे सयत घरकान्न आनी दोन भुरगीं ह्या घरात रावतात. तांकां नवें घर बांदपा खातीर सरकारान सहकार्य करचें अशी मागणी निलेश सातोडकार हांणी केली.
मामलेदारान केली पळोवणी
दिवचल म्हालाचे मामलेदार राजाराम परब हांणी बिरेस्तारा निलेश सातोडकार हांच्या कोसळिल्ल्या घराची पळोवणी केली. तांची लागींच आशिल्ल्या सरकारी शाळेच्या वर्गांत रावपाची वेवस्था करून दिली. तांचे सयत तलाठी शाबी फोंडेकार हाजीर आशिल्ले.
निलेश सातोडकार हांचें घर पुराय कोसळिल्ल्यान तांणी कश्ट करून दवरिल्लें भात पावसांत भिजिल्ल्यान तांच्या तोंडाचो घांस गेल्ल्याचें तांचे घरकान्नीन सांगलें. आतां भुरग्यांच्या प्रस्न भेडसायत आशिल्ल्याचें तांणी म्हणलें. सरकारान आमकां तत्काळ मजत करची अशीय मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
