भांगरभूंय | प्रतिनिधी
नगरसेवक महेश आमोणकार हांची कारवायेची मागणी
मडगांव: मडगांव पालिका इमारतीचे आशिकुशीच्या वाठारांतले पार्कींग सुवातेंत ‘रेंट अ बायक’ पार्क करीत आशिल्ल्याचो मुद्दो हाचे आदीं पालिका बसकेंत गाजिल्लो आनी कारवाय लेगीत केल्ली. आतां परतून एकदां पालिका इमारतीचे फाटले वटेन पार्कींग प्रकल्प येवपाचो आशिल्ले सुवातेर ‘रेंट अ बायक’ पार्क करून दवरल्यात. हाचेर नगरसेवक महेश आमोणकार हांणी कारवायेची मागणी केली.
मडगांव पालिका इमारतीच्या दुचाकी पार्कींग सुवातेंत तशेंच पालिका मार्केटांत येवपी गिरायकांच्या वाहन पार्किंगेचे सुवातेंत रेंट अ बायक पार्क करतात. हाचे आदीं नगरसेवक महेश आमोणकार हांणी मडगांव मुख्याधिकारी आनी नगराध्यक्ष हांचे कडेन कागाळी केल्यात. पालिकेन ‘रेंट अ कार’ आनी ‘रेंट अ बायक’ धनयां कडेनूय चर्चा केल्या. पूण उपरांत लेगीत रेंट अ बायक पालिका वाठारांत दीस रात पार्क केल्ल्यो दिसून येत आशिल्ल्यान नगराध्यक्ष दामोदर शिरोडकार हांणी नगरसेवक, पालिका अधिकारी, येरादारी पुलीस, आरटीओ हांची जोड बसका आयोजीत केल्ली.
बसके उपरांत कांय काळ आरटीओन दंडात्मक कारवाय केली आनी इमारती कुशीचो वाठार ‘रेंट अ बायक लावपा पसून मेकळो केलो. आतां तर ‘रेंट अ बायक’ धनयांनी मडगांव पालिकेच्या इमारतीचे फाटले वटेनचे सुवातेंत जंय भोवमजली पार्कींग प्रकल्प येवपाचो थंय सुमार 50 परस चड रेंट अ बायक उब्यो करून दवरल्यात. पालिकेची सुवात आतां रेंट अ बायककारांनी बळकायल्या आनी पालिकेच्या वाहनांक थंय सुवात उपलब्ध जायना अशें नगरसेवक महेश आमोणकार हांणी सांगलें.
तशेंच पालिका इमारतीचे भायले वटेन दोनूय कुशींनी टेबल आनी कदेलां घालून ‘रेंट अ बायक’ आनी मोटार भाड्यान दिवपी व्यक्तींची टेबल आनी कदेलां सुरक्षा रक्षकाक सांगून नगरसेवक आमोणकार हांणी जप्त करून पालिकेंत हाडून दवरल्यांत. मडगांव मुख्याधिकाऱ्यान आनी नगराध्यक्षान रेंट अ बायककारांची मुजोरी खपोवन घेवची न्हय अशी मागणी आमोणकारान केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
