बीए एलएलबी प्रवेश प्रक्रिया : कारे काॅलेजीचे प्राचार्य, ग्रंथपाल निलंबीत

भांगरभूंय | प्रतिनिधी

मडगांव : बीए एलएलबी प्रवेश प्रक्रियेंतलो बदल कारे कायदो म्हाविद्यालयाचे प्राचार्य साबा डिसिल्वा हांकां म्हारग पडलो. तांकां सेवेंतल्यान निलंबीत केल्यात. म्हाविद्यालयांतले ग्रंथपाल आनंद साळवे हांचेरूय निलंबनाची कारवाय केल्या. म्हाविद्यालयाच्या वेवस्थापनाकडल्यान गोंय विद्यापीठाच्या निर्देशा प्रमाण निलंबनाची कारवाय केल्या.
गोंय विद्यापीठ सामान्य कायदो प्रवेश प्रक्रिया (जीयूसीएलएटी) 2023 हे परीक्षेंत कितेंतरी भानगड जाल्ल्याची कागाळ गोंय विद्यापिठा कडेन केल्ली. जीयूसीएलठटी 2023 हे प्रवेश प्रक्रि येंत भानगडीच्या आरोपाचे फाटभूंयेर गोंय विद्यापीठा कडल्यान समिती नेमून चवकशी केली. ह्या चवकशी समितीच्या अहवाला उपरांत गोंय विद्यापीठान बीए एलएलबीची प्रवेश प्रक्रियाच रद्द केली. तशेंच बीए एलएलबीच्या प्रवेशा खातीर परत प्रवेश प्रक्रिया घेतले अशें स्पश्ट केल्लें. उपरांत गोंय विद्यापीठाच्या या आदेशाक लागून विद्यार्थ्यांचें लुकसाण जावपाचें आशिल्ल्यान विद्यार्थ्यां कडल्यान उच्च न्यायालयांत ह्या निर्णया आड याचिका दाखल केली. गोंय विद्यापीठान सोमार मेरेन तोडगो काडटले अशी म्हायती खंडपीठांत दिली. ते प्रमाण उच्च न्यायालयान गोंय विद्यापीठाची बीए एलएलबीची प्रवेश प्रक्रिया रद्द करपाच्या आदेशाक फुडें धुकलून 31 जुलयाक सुनावणी दवरल्या. तशेंच विद्यार्थ्यांक वर्गांत हाजीर रावपाक सांगलां.

मजगतीं, बिरेस्तारा कारे कायदो म्हाविद्यालयाचे प्राचार्य साबा डिसिल्वा हे बीए एलएलबी प्रवेश परीक्षा प्रक्रियेंत भानगड केल्ले खातीर दोशी सांपडिल्ल्यान गोंय विद्यापिठान संबंदीत वेवस्थापनाक प्राचार्यांक निलंबीत करपाचे आदेश दिल्ले. ते प्रमाण वेवस्थापनाकडल्यान प्राचार्य साबा डिसिल्वा आनी तांकां हातूंत मजत करपी ग्रंथपाल आनंद साळवे हांचे निलंबनाची कारवाय केली.