भांगरभूंय | प्रतिनिधी
मायणा कुडटरी पुलिशेंत कागाळ
मडगांव: कांय सप्तकां पयलीं रुमडामळ पंचायतीचे पंच विनायक वळवयकार हांचेर चाकवान हल्लो केल्लो. उपरांत कांय दीस पुलीस संरक्षणूय तांणी घेतिल्लें. मंगळारा रातीं परतून एकदां पंच वळवयकार हांचे मोटारीचो कुशीचो हारसो अनवळख्यांनी फोडलो. ह्या प्रकरणांत पंच वळवयकारान पुलिशेंत कागाळ नोंद करून चवकशेची मागणी केल्या.
पंच विनायक वळवयकार हांणी दिल्ले म्हायती प्रमाण मंगळारा रातीं रुमडामळ वाठारांत पार्क केल्ल्या तांच्या मोटारीचो दावे वटेनचो हारसो अनवळख्यांनी फोडलो. दांड्या सारके वस्तून नेटाचो वार करून मोटारीचो हारसो फोडिल्ल्याचें दिसून येता आनी तुटिल्ल्या हारशाचो भाग कुशिकूच रानांत पडिल्ल्याचें दिसून आयलें.
सकाळीं मोटारी म्हऱ्यांत आयले उपरांत हो प्रकार लक्षांत आयलो. पंच विनायक हांणी रोखडीच मायणा कुडटरी पुलीस स्टेशनार हे विशींची म्हायती दिली. पुलिसांनी घडणूक थळार येवन पळोवणी करून पंचनामो केलो. पंच वळवयकार हांणी मायणा कुडटरी पुलिशेंत ह्या मोडतोड प्रकरणां विशींची कागाळ नोंद केल्या.
ह्या प्रकरणांत मायणा कुडटरी पुलिसांनी खोलायेन चवकशी करची. कांय सप्तकां पयलीं प्रभागांतल्या बेकायदो मदरशाचो मुद्दो पंचायतीचे बसकेंत काडिल्लो. त्याच मुद्या वयल्यान ही मोडतोड बी केल्या काय कितें हाची चवकशी करून रुमडामळ वाठारांतल्या समाज विद्वाट्यांक अटक करची अशी मागणी पंच वळवयकार हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
