भांगरभूंय | प्रतिनिधी
येरादारी ठप्प; कोंकण रेल्वे मार्गान वळयल्यो गाडयो
वास्को: दक्षीण अस्तंत रेल्वेच्या कॅसरलॉक-करजील मजगतीं मंगळारा सांजवेळा व्हडलें पालसण रेल्वे मार्गार कोसळिल्ल्यान रेल्वेची येरादारी पुरायपणान ठप्प जाली. पयसुल्ल्यो प्रवासी रेल्वे कोंकण रेल्वेच्या मार्गा वयल्यान वळयल्यो. जाल्यार कांय प्रवासी रेल्वे गाडयो रद्द केल्यो. पालसण कोसळ्ळे उपरांत रेल्वे मार्गार एकठांय जाल्ली माती, फातर हांच्यो राशी कुशीक काडपा खातीर पांच अवजड यंत्रां तशेंच अभियंते, 100 गँगमन, मजूर कामाक लागल्यात. हो रेल्वे मार्ग रोखडोच उक्तो करपा खातीर आमचे यत्न सुरू आशिल्ल्याचें दक्षीण अस्तंत रेल्वेच्या एका वरिश्ठ अधिकाऱ्यान सांगलें.
मंगळारा 25 वेर सांजवेळा रेल्वे मार्गार एक मोटें पालसण कोसळिल्ल्याची म्हायती दक्षीण अस्तंत रेल्वेच्या हुबळी विभागाक मेळ्ळी. रोखडोच अधिकारी, अभियंते, यंत्रां आनी मजूर हांचो पंगड धाडून दिलो. तांणी रोखडीच कामाक सुरवात केली. मजगतीं, रेल्वे मार्गार व्हड प्रमाणांत एकठांय जाल्ले फातर, माती आनी हेर साहित्याक लागून रेल्वे मार्ग बंद जाला. ताका लागून वास्को सावन यशवंतपूराक वचपी प्रवासी रेल्वे रद्द केली. जाल्यार यशवंतपूर सावन वास्को येवपी रेल्वे हुबळी रेल्वे स्टेशनार थांबयल्या.
जाल्यार दिल्ली सावन वास्को येवपी हजरत निजामुद्दीन सुपर फास्ट रेल्वे बेळगांव रेल्वे स्टेशनार थांबयल्या. ह्या गाडयांतल्या प्रवाशांक तांच्या इत्सूक थळार वचपा खातीर रेल्वेन विनाशुल्क बस सेवा दिल्ली.
दक्षीण अस्तंत रेल्वेच्या पयसुल्ल्या पल्ल्याच्यो गाडयो कोंकण रेल्वेच्या मडगांव रेल्वे स्टेशना वयल्यान वळयल्यात. वास्को रेल्वे स्टेशनार आयिल्ल्या प्रवाशांनी रेल्वे सेवा रद्द केल्ल्याचें समजतकूच कांय जाणांनी भाड्याची वाहनां करून मडगांव आनी हेर रेल्वे स्टेशनां गांठलीं. तिकेट रद्द केल्ल्यांक तांची रक्कम दिल्ल्याचें रेल्वेच्या गोपांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
