भांगरभूंय | प्रतिनिधी
कोरगांव: मदलोवाडो पार्श्यां कमकुवत जाल्लो रस्तो खचून गुजरातांतलो म्हाल व्हरपी ट्रक रुतलो. अवजड वाहनां लवंडुपाचो धको आशिल्ल्यान रस्त्याचें काम योग्य पद्दतीन करचें अशी थळाव्यांनी मागणी केल्या.
मांद्रें मतदारसंघांत उपवीज पुरवण केंद्र येत आशिल्ल्यान रस्त्याच्या दोनूय वटांनी खणून वीज वाहिन्यो घाल्यात. खणपाचें काम केले उपरांत ती सुवात लोबर घालून सोलींग करूंक जाय आशिल्ली. तशेंच ताचेर रोलर घुंवडावपाची गरज आशिल्ली. पूण कंत्राटदारान कमकुवत काम केल्ल्यान रस्तो खचून वाहन चालकांक हाचो त्रास सोंसचो पडटा.
एखादे गाडयेक सायड दितना चार चाकी वा दुचाकी वाहन ह्या खणिल्ले सुवातेंत रुतून उरतात. हे सुवातेर खूबशे अपघातूय घडल्यात. हाचेर संबंदीत अधिकाऱ्यांनी तशेंच थळावे पंचायतीन फाटपुरवण करून लक्ष दिवपाची गरज आसा.
विकास करतना लोकांचोय विचार करचो. ह्या मार्गार अवजड वाहनां यो-वच करतात. ट्रक सकयल बी पडत जाल्यार खूबशा घरांक धोको उप्रासूं येता. अश्यो घडणुको हाचे मुखार जावच्यो न्हय हे खातीर सरकारान लक्ष दिवचें अशी मागणी थळावे नागरीक गुरुदास पांडे हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
