भांगरभूंय | प्रतिनिधी
तरणाटी फोंडकुलांत पडून जखमी; फोंडकुलां पुरोवपाची मागणी
फोंडें: उसगांव ते गांजे मेरेनचो रस्तो सद्या अपघातांक आमंत्रण दीत आसा. कांय सुवातांनी रस्त्या वयलीं फोंडकुलां दिसानदीस घातक जायत आसात. गांजे वाठारांत बुधवारा सकाळीं एक तरणाटी स्कुटरी वयल्यान वता आसतना फोंडकुलांत पडून जखमी जाली. जखमी तरणाटेक उपचारा खातीर भलायकी केंद्रांत दाखल केल्या. एखाद्री व्हड घडणूक घडचे पयलीं घातक फोंडकुलां पुरोवपाची मागणी वाहन चालक करीत आसात.
गांजे वाठारांत कांय दिसां पयलीं अनवळख्यांनी घातक फोंडकुलांनी नरकासुराचें म्होंवाळें उबें करून वाहन चालकांक सादूर करपाचो यत्न केल्लो. पूण फाटले दोन दीस पडत आशिल्ल्या पावसाक लागून फोंडकुलांचें स्वरूप वाडलां. फोंडकुलांनी उदक भरून उरत आशिल्ल्यान फोंडकुलांचो अदमास येना.
बुधवारा सकाळीं एक तरणाटी स्कुटरी वयल्यान वता आसतना फोंडकुलांत पडली. हातूंत तिच्या पांयाक गंभीर जखम जाली. थळाव्यांनी तशेंच वाहन चालकांनी जखमी तरणाटेक खाजगी वाहनांतल्यान भलायकी केंद्रांत व्हेली.
उटंगाराटच्या पावसाक लागून फोंडकुलांचो आकार वाडत आसा. ताचो परिणाम दुचाकी चालकांचेर दिसून येता. चडशें रातच्या वेळार वाहन चालकांक फोंडकुलांचो अदमास येना. पावस पडत आसतना फोंडकुलांचो आकार लेगीत दिसून येता. हाका लागून अपघात घडत आसात. फोंडकुलां पुरयलीं नात जाल्यार फुडल्या कांय दिसांनी आनीक अपघात जावपाची शक्यताय आसा.
उसगांवां पंचायत कचेरे कुशीक आशिल्ल्या मुखेल रस्त्या वयलें फोंडकूल घातक थारलां. दर वर्सा तेच सुवातेर हें फोंडकूल तकली वयर काडटा. कितल्योशोच दुचाकी ह्या फोंडकुलांत पडून चालक जखमी जाल्यात. रातच्या वेळार हें गोल आकाराचें फोंडकूल अदीक घातक थारत आसा. उसगांव जंक्शना सावन धारबांदोड्यां वचपी वाहन चालकांक आकारान गोल आशिल्ल्या फोंडकुलाचो घात चड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
