भांगरभूंय | प्रतिनिधी
कामाचो दर्जो निकृश्ठ: सुभाष फळदेसाय
चवकशीचो दिलो आदेश
दिवचल: नार्वेंच्या इतिहासीक श्रीसप्तकोटेश्वर देवळाचें सुमार सात कोटी रुपया खर्च करून केल्लें नुतनीकरणाचें काम निकृश्ठ दर्जाचें जाल्ल्याचो निश्कर्श स्वता पुरातत्व खात्याचे मंत्री सुभाष फळदेसाय हांणी काडलो. ह्या देवळाक गळटी तशेंच वीज वेवस्था, घाल्ले टायल्स निसरट आशिल्ल्यान पुराय कामाची चवकशी करतले अशी म्हायती सुभाष फळदेसाय हांणी दिली.
मंत्री सुभाष फळदेसाय, आमदार प्रेमेंद्र शेट हांणी काल (बुधवार) सकाळीं ह्या देवळाक भेट दिली. देवळाक उदकाची गळटी लागिल्ली आसून सकयल्या वाठारांतूय गळटी आसा. तशेंच कामांक खूबशो त्रुटी आशिल्ल्यान देवळाच्या वट्ट कामा विशीं खोलायेन चवकशी करपाची मागणी आमदार प्रेमेंद्र शेट हांणी केली. ह्या वेळार कंत्राटदार, देवस्थानाचे पदाधिकारी हाजीर आशिल्ले.
पुरातत्व खात्यान ह्या कामाची देखरेख भौशीक बांदकाम खात्याक दिल्ली. तांणी योग्य जापसालदारकी घेतिल्ली ना हें स्पश्ट जाता. हातूंत कोण दोशी आसा हाची सविस्तर म्हायती घतले अशें फळदेसाय हांणी सांगलें.
नुतनीकरण जाल्ल्या देवळाच्या उक्तावणाक व्हड संख्येन लोकांनी हाजेरी लायिल्ली. तशेंच देश-विदेशांतूय ह्या देवळाची नामना आसा. आयज ही स्थिती जाल्ल्यान भाविकांनी अजाप उक्तायलां. आमदार प्रेमेंद्र शेट हांणी हे विशींची विस्तारान चवकशी करपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
