पत्रकारां खातीर पणजे पत्रकार कक्ष : मुख्यमंत्री

भांगरभूंय | प्रतिनिधी

गोंय पत्रकार संघाचो (गुज) स्थापणूक दीस उमेदीन

पणजी: हें वर्स मेरेन पत्रकारांक पणजी शारांत सगळ्यो सुविधायो आशिल्ली पत्रकार कक्ष मेळटलो, अशें आस्वासन मुख्यमंत्री डॉ. प्रमोद सावंत हांणी दिलें. मुख्यमंत्री आयज गोंय पत्रकार संघाच्या (गुज) 46 व्या स्थापणूक दीस आनी पत्रकारिता पुरस्कार 2021-2022 भेटोवपाचे कार्यावळींत ते मुखेल सोयरे ह्या नात्यान उलयताले.

पत्रकारिता पुरस्कार जैतिवंतांक परबीं भेटोवन करून डॉ. सावंत हांणी पत्रकारां खातीर ई-बाईक घेवपाक अर्थीक मदत दिवपा खातीर अर्थसंकल्पांत तजवीज केल्ल्याचें सांगलें. हे येवजणेची अंमलबजावणी करपाचें काम चालू आसा. तशेंच फुडल्या वर्सा सावन पत्रकारां खातीरच्या घरबांदणी येवजणे खातीर अर्थसंकल्पांत तजवीज करपांत येतली, अशेंय तांणी सांगलें.
बातम्यांचे विश्वसनीयते विशीं आपले मत उक्तायतना मुख्यमंत्र्यान पत्रकारांनी बातमी प्रसिध्द करचे पयलीं ते बातमेचें सत जाणून घेवपाक सांगलें. चुकीची वा असत्य बातमी प्रसिध्द केली जाल्यार प्रसारमाध्यमांची विश्वसनीयता उणी जातली, अशें तांणी म्हणलें.

कार्यवळीक मानाचे सोयरे म्हणून हाजीर आशिल्ले विरोधी पक्ष फुडारी युरी आलेमाव हांणी पत्रकारांक संघाच्या 46 व्या स्थापणूक दिसाचीं आनी पुरस्कार जैतिवंत पत्रकारांक परबीं भेटयलीं. पत्रकारांक उर्बा दिवपा खातीर तांच्या कामाची दखल घेवप गरजेचें आशिल्ल्याचें सांगून फेक न्यूज एजन्सी विशीं तांणी हुस्को उक्तायलो. तशेंच पत्रकारांनी अशा फेक न्यूज एजन्सीं कडल्यान सादूर रावपाची गरज तांणी उक्तायली.

म्हायती आनी प्रसिध्दी खात्याचे संचालक दीपक बांदेकार हांणी देशांतल्या दरेका घटकां खातीर प्रसारमाध्यमां म्हत्वाचीं आशिल्ल्याचें सांगलें. पत्रकारांक प्रोत्साहन दिवपा खातीर गुजा प्रमाण म्हायती आनी प्रसिध्दी खात्या वतीनय गोंय राज्य पत्रकार पुरस्कार येवजणेची अंमलबजावणी करता अशें तांणी सांगलें.
मुख्यमंत्र्यान अर्थसंकल्पात दिल्ल्या आस्वासना प्रमाण पत्रकार निवृत्ती वेतन म्हयन्याक 10,000 रुपया केलां आनी ताचें जून म्हयन्या सावन वितरण सुरू जालां. बांदेकर हांणी पत्रकारांक सरकार आनी समाजामदीं समन्वय निर्माण करपाचें काम करपाची मागणी केली.

मुख्यमंत्र्यांच्या हस्तुकीं ज्येश्ट ग्रामीण पत्रकार रामनाथ देसाय आनी दयानंद राणे हांचो ग्रामीण पत्रकारिता मळावेले समर्पीत सेवे खातीर ज्येश्ठ पत्रकार सुरेश वाळवे हांच्या नांवान पुरस्कार भेटोवन सत्कार केलो.

पर्यावरण पत्रकारिते खातीरचो फेलिसिओ कार्दाज पुरस्कार गौरी मळकर्णेकार (द टायम्स ऑफ इंडिया), पर्यावरणीय फोटाग्राफी खातीरचो सिरील डिकुन्हा पुरस्कार राकेश मुड्ये आनी सगूण गावडे (हेराल्ड) हांकां भेटयलो.

सोद पत्रकारिते खातीरचो लॅम्बर्ट मास्कारेन्हस पुरस्कार न्यूटन सिक्वेरा (द टायम्स ऑफ इंडिया) आनी गेरार्ड डीसुझा (हिंदुस्तान टायम्स) हांकां भेटयलो.

ग्रामीण पत्रकारिते खातीरचो सुरेश वाळवे पुरस्कार अजय लाड (गोवन वार्ता) आनी निर्घोष गावडे (द नवहिंद टायम) हांकां भेटयलो.

कला आनी संस्कृती पत्रकारिते खातीरचो पुरस्कार रामनाथ पै रायकार (द नवहिंद टायम्स) आनी गौरी मळकर्णेकार (द टायम्स ऑफ इंडिया) हांकां भेटयलो.

क्राइम पत्रकारिते खातीरचो औदुंबर शिंदे पुरस्कार गौरी मळकर्णेकार (द टायम्स ऑफ इंडिया) आनी विभा वर्मा (द गोवन) हांकां भेटयलो.

लेआउट आनी पेज डिजायन खातीरचो पुरस्कार मनोज शिरोडकार (हेराल्ड) आनी सुनील डिचोलकार (हेराल्ड) हांकां भेटयलो.

खेळा पत्रकारिता पुरस्कार मार्कूस मेरगुल्हाओ (द टायम्स ऑफ इंडिया), टीव्ही/डिजीटल पत्रकारिता पुरस्कार लौकीक शिलकार (प्रुडंट) आनी उपेंद्र नायक (गोमंतक टीव्ही) हांका भेटयलो.

गुजचे अध्यक्ष राजतिलक नायक हांणी मानेस्तांक येवकार दिलो. वासुदेव पागी हांणी निमाणे उपकार मानले. प्रज्ञा राणे आनी सचीन सुर्लीकार हांणी कार्यावळीचें सुत्रसंचालन केलें.