भांगरभूंय | प्रतिनिधी
भांगरभूंय । प्रतिनिधी
मडगांव : गोंय विद्यापीठान बीए एलएलबीची प्रवेश प्रक्रिया रद्द केली. ह्या निर्णया आड मडगांवच्या कारो कायदो म्हाविद्यालयांतले बीए एलएलबीच्या विद्यार्थ्यां वांगडा तांच्या पालकांनी आंदोलन केलें. विद्यार्थ्यांक परत परिक्षेक बसपाचें सांगून तांचो मानसीक छळ केल्ल्याचो आरोप ह्या वेळार पालकांनी केलो.
मंगळारा सकाळीं गोंय विद्यापिठान एक नोटीस जारी केली आनी बीए एलएलबीची प्रवेश परिक्षा परत जातली अशें जाहीर केलें. जीसीएलएटी 2023 हे परिक्षेंत कितेंय तरी वायट प्रकार घडिल्ल्याचो आरोप ह्यान पयलीं जाल्लो. ताची चवकशी करपी समितीच्या शिफारसी उपरांत विद्यापिठान प्रवेश प्रक्रिया रद्द केली. तशेंच प्रवेशा खातीर जीसीएलएटी परीक्षा परत घेवपाचें जाहीर केलें. तो मेरेन बीए एलएलबीचे वर्ग घेवचे न्हय अश्यो सुचवण्योय केल्यो.
कारो कायदो म्हाविद्यालयांत आयज सकाळीं विद्यार्थी पालकां वांगडा दाखल जाले. तेन्ना बीए एलएलबीच्या विद्यार्थ्यांक वर्गांत बसपाक दिवंक नाशिल्ल्यान पालकांनी वेवस्थापनांतल्या अधिकार्यांक जाब विचारलो. प्रवेश प्रक्रिया जावन आतां 48 दीस जाल्ल्यान आता परत प्रवेश परीक्षा घेवपाचो निर्णय चुकिचो आशिल्ल्याचें मत तांणी उक्तायलें.
ज्या विद्यार्थ्यांक बीए एलएलबीच्या वर्गांत प्रवेश दिला तांणी प्रवेश प्रक्रिया, मुलाखत आनी विद्यापिठान सांगिल्ली प्रवेश फीय भरल्या. आतां मदींच गोंय विद्यापिठान प्रवेश प्रक्रिया परत घेवपाचो निर्णय हो विद्यार्थ्यांचेर अन्याय आशिल्ल्याचें हर्षल देसाय हांणी म्हणलें.
परत प्रवेश प्रक्रिये पसून सुरुवात करपाच्या निर्णयाक लागून विद्यार्थी तशेंच पालकांकूय मानसीक त्रास जाता. वेवस्थापनाक हाची जाणविकाय आसा. आतां उच्च न्यायालयांतल्या निर्णया उपरांत फुडली भुमिका थारायतले, अशें पालकांनी सांगलें. सकाळीं उसरां मेरेन पालकां वांगडा विद्यार्थी म्हाविद्यालय वाठारांत गर्दी करून आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
