जनावरां कडल्यान शेतीचें लुकसाण
भांगरभूंय | प्रतिनिधी
सभाघरांत आमदारां कडल्यान हुस्को
सरकारा कडल्यान कसलेंच ठोस आस्वासन ना
पणजी : मोर तशेंच हेर जनावरां कडल्यान शेती आनी बागायतीचें लुकसाण जाता, हे विशीं सभाघरांत आमदारांनी हुस्को उक्तायलो. शेतकरी आधार निधी खाला मजत दिवपा शिवाय सरकारा कडेन हाचेर हेर कसलोच उपाय ना. जनावरांक आमी मारूं शकना. मारपाचेर केंद्राची बंदी आसा, अशें शेती मंत्री रवी नायक हांणी सांगलें.
पर्येंची आमदार देविया राणे हांणी जनावरां कडल्यान जावपी शेतीच्या लुकसाणेचो विशय लक्षवेधी सुचोवणे वरवीं मांडलो. हाचेर उपाय करपाची मागणी तांणी केली. पर्यें मतदारसंघांत शेतकार तशेंच बागायती करपी लोकांचो आंकडो मोठो आसा. धुकर, गव्या रेड्यांक लागून 5 हजार शेतकारांचें लुकसाण जालां. दर वर्सा लुकसाण जाता. पर्यें मतदारसंघांतूच न्हय तर पुराय गोंयांत जनावरां कडल्यान शेतीचें लुकसाण जाता, अशी समस्या आमदार देविया राणे हांणी मांडली. शेती सयत केळमे, कवाथे, माडयो आनी काजीचे रोंपे जनावरां हुमटून काडटात. हाचेर उपाय करपाची मागणी देविया राणे हांणी केली. सोलर फेंसिंग घालपाक मान्यताय दिवची, अशी मागणी तांणी केली.
शेती मंत्री रवी नायक हांणी ठोस अशें आस्वासन दिवंक ना. जनावरां कडल्यान जावपी लुकसाणीचेर शेतकरी आधार निधी वरवीं शेतकारांक लुकसाण भरपाय दिता. शेतकाराक 6 हजार रूपया मेरेन लुकसाण भरपाय दिवपाची, कुंपण (फेंसिंग) घालपाक सुद्दा खातें मजत दिता. जनावरां मारपाक कोणाकूच मेळना. जनावरां मारपाचेर बंदी आसा, अशें मंत्री रवी नायक हांणी सांगलें. आमदार अलेक्स रेजिनाल्ड तशेंच डॉ. चंद्रकांत शेट्ये हांणी हो विशय मांडलो.
आयटी भशेन शेतकारां खातीरूय स्टार्ट अप धोरण आसपाक जाय, अशें डॉ. चंद्रकांत शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
