भांगरभूंय | प्रतिनिधी
पेडणें : सैमाचें लुकसाण जावचें न्हय देखून दरेक मनीस कार्यरत आसता. पूण मागणी तशी पुरवणूय जाता. जर जागृत नागरीक वा गणेश भक्तांनी प्लास्टर ऑफ पॅरिसच्या मुर्तींची मागणीच करूंक ना जाल्यार त्यो बाजारांत येवच्योच नात. तशेंच जांच्या घरांत प्लास्टर ऑफ पॅरिसच्यो मूर्ती आसात त्या घरांत आपूण पुजेक वच्चो ना, अशें जर भटजींनी थारायलें जाल्यार ह्या मुर्तींचेर नियंत्रण येतलें अशें मत खारेबांध- पेडणेंच्या 123 वर्सांची परंपरा आशिल्ले पालयेंकार चित्र शाळेचे मुखेली अरविंद उर्फ अरुण पालयेंकार हांणी उक्तायलें.
खारेबांध गांधीतीर शेजराक आशिल्ले पालयेंकार गणेश चित्र शाळेंत दर वर्सा 125 परस चड मूर्ती तयार करपाचें काम आजुनूय नेटान चालू आसा. शारांतल्यो भौशीक गणेश मुर्तीय हेच चित्रशाळेंत तयार करतात. ह्या काळांत हें पुराय कुटूंब गणेश चित्र शाळेंत मूर्ती तयार करपाक व्यस्त आसता. पालयेंकार भावांचे चित्र शाळें प्रवेश केल्यार तरणाटे, बाल कलाकार लेगीत मातयेंत हात घालून गणेश मुर्तींक आकार दितना पळोवपाक मेळटा.
राज्यांत चिकण माती चड प्रमाणांत ना. ताका लागून ती भायल्यान मागोवची पडटा. राज्यांत खुबशे सुवातींचेर प्लास्टर ऑफ पॅरीसच्यो मूर्ती विकतात. तांची पळोवणी संबंदीत सरकारी अधिकारी करिनाशिल्ल्यान पालयेंकार हांणी खंत उक्तायली. सध्या रंगांची वाडिल्ली रक्कम, मेळनाशिल्ली माती आनी कामगाराचो दिसवडो हाका लागून मूर्ती करतना आडखळी येतात अशें पालयेंकार हांणी फुडें म्हणलें.
मुर्तीचें काम करपाक भाव मोहन पालयेंकार, विश्वास पालयेंकार, प्रकाश पालयेंकार, विजय पालयेंकार मजत करतात. तशेंच घरकान्न, उपनगराध्यक्ष अश्विनी पालयेंकार हीय रंगकामांत मजत करता अशें अरविंद पालयेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
