भांगरभूंय | प्रतिनिधी
पेडणें : पेडणें पालिकेन बारा वर्सां आदीं वट्ट साडे चार कोटी रुपया खर्च करून कोयर प्रकल्प उबारिल्लो. हो कोयर प्रकल्प आजूनय सुरू जावंक ना. आतां ह्या प्रकल्पाक तेंकून खाजगी मिनी इंडिया थीम पार्क प्रकल्प स्थापन करतात. ताका लागून ह्या कोयर प्रकल्पाचो फुडार कितें काय? असो प्रस्न निर्माण जाला.
तालुक्यांतली कोयराची समस्या सोडोवपात पेडणें पालिकेन साडेचार कोटी रुपया खर्च करून सुडा वतीन हो कोयर प्रकल्प उबारिल्लो. ताचें अर्दवट परिस्थितींत आदले पालिका मंत्री फ्रान्सीस डिसोजा आनी आदले भलायकी मंत्री लक्ष्मीकांत पार्सेकार, आदले सभापती राजेंद्र आर्लेकार आनी आदले नगराध्यक्ष डॉ. वासुदेव देशप्रभू हांचे हाजेरींत उक्तावण जाल्लें. आतां ह्याच कोयर प्रकल्पाच्या कुशीक थीम पार्क हो नवो प्रकल्प उबारता. देखून कोयर प्रकल्पाचो फुडार काळखांत वयचो ना न्हय? ह्या प्रकल्पा खातीर खर्च केल्ले कोट्यांनी पयशे उदकांत वयचे ना न्हय? अशें नागरिकांनी सांगलें.
हो कोयर प्रकल्प ह्या म्हालांत म्हत्वाचो थारता. तातूंत दिसाक पांच हजार कील कोयर तयार जाता. पर्यटन हंगामांत तो वाडटा. वट्ट 20 ग्रामपंचायती आनी एक नगरपालिका वाठारा खातीर त्या काळांत हो म्हत्वाचो प्रकल्प मानताले. पूण आयज ताची परिस्थिती सामकी वायट जाल्या.
हांगां दुर्गंध पातळ्ळा. यंत्रांक कळम आयल्या. सुडान एके बंगळुरुचे कंपनीक आठ हजार चौरस मिटर जमीन इंधन प्रकल्प उबारपा खातीर दिल्ली. तोय प्रकल्प आजून सुरू जावंक ना. पूण ह्या प्रकल्पाक जोडून वट्ट 92 चौरस मिटर जमिनींत मिनी इंडिया थीम पार्क प्रकल्प उबो जाता. देखून हो कोयर प्रकल्प हांगा कायमचो उरतलो? काय हांगच्या कोयर प्रकल्पाचें रुपांतर कोयरांत जातलें? हें सांगप सध्या कठीण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
