भांगरभूंय | प्रतिनिधी
साबाजी शेट्ये लांच प्रकरण
पणजी: उत्तर गोंय जिल्हो आनी सत्र न्यायालयान आदले उत्तर गोंय अतिरिक्त जिल्होधिकारी साबाजी शेट्ये आड लांच प्रकरणाचो खटलो सुरू करपाचो आदेश जारी केल्लो. हो आदेश मुंबय उच्च न्यायालयाच्या गोंय खंडपिठान रद्द केल्लो. ते प्रमाण सत्र न्यायालयान शेट्येची वयल्या आरोपांतल्यान सुटका केल्या.
ह्या प्रकरणांत सल्लागार अभियंतो निशिकांत कुराडे हांणी एसीबीत 19 मे 2017 दिसा कागाळ दाखल केल्ली. ते प्रमाण शेट्येन हरकत ना दाखलो दिवपा खातीर लांच मागिल्ल्याचो दावो केल्लो. ताची म्हायती दक्षता खात्याच्या भ्रश्टाचार विरोधी पंगडाक (एसीबी) दिली. एसीबीन 6 जून 2017 दिसा साबाजी शेट्येक 25 हजार रुपयांच्या लांच प्रकरणांत अटक केल्ली. उपरांत ह्या प्रकरणांत एसीबीन शेट्ये आड भ्रश्टाचार प्रतिबंधक कायद्या खाला गुन्यांव दाखल केलो. उपरांत शेट्येक 12 जून 2017 दिसा 1 लाख रुपया आनी हेर अटींचेर सशर्त जामीन मंजूर केल्लो.
ह्या प्रकरणाची चवकशी पुराय जाल्ल्यान एसीबीन शेट्ये आड न्यायालयांत आरोपपत्र दाखल करून खटलो चलोवपा खातीर तेन्नाच्या मुख्य सचिवा कडेन 21 जून 2018 दिसा मंजुरी मागिल्ली. ते प्रमाण 7 नोव्हेंबर 2018 दिसा मंजुरी दिल्ली. मजगतीं त्या वेळार एसीबीन मुख्य सचिवा कडेन आरोपपत्राचो मसुदो वा कसलेच तरेचे पुरावे सादर करूंक नाशिल्ल्याचें सरकाराचे नदरेक आयलें. ते खातीर सरकारान परतून मंजुरी मेळोवपा खातीर हें प्रकरण सक्षम प्राधिकरणा मुखार सादर केल्लें.
त्या वेळार शेट्येन संबंदीत चार फायलीं मदल्यो दोन फायली पयलींच मंजूर केल्ल्यो. तशेंच हेर दोन फायली संबंदीत अधिकाऱ्यांक तांचे सुचोवणे खातीर धाडून दिल्ल्यो. ताका लागून लांच मागिल्ल्याचें सभावीकपणान असंभव आशिल्ल्याचो दावो केल्लो. ते प्रमाण सक्षम प्राधिकरण तशेंच कार्मीक खात्याच्या मंत्र्यांनी 7 जानेवारी 2023 दिसा मंजुरी दिवपाक न्हयकार दिलो. उपरांत एसीबीन न्यायालयांत आरोपपत्र दाखल करपाक परवानगी मेळूंक नाशिल्ल्यान 21 जानेवारी 2023 दिसा प्रकरण बंद करपा खातीर पणजेंतल्या उत्तर गोंय जिल्हो आनी सत्र न्यायालयांत अंतीम अहवाल सादर केलो. हें प्रकरण बंद करपाक न्हयकार दिवन न्यायालयान दखल घेवन सुनावणी सुरू केल्ली. हाका विरोध करून शेट्येन मुंबय उच्च न्यायालयाच्या गोंय खंडपिठांत आव्हान दिल्लें.
भ्रश्टाचार प्रतिबंधक कायद्यांत दुरुस्ती प्रमाण, मंजुरी गरजेची आशिल्ल्यान आनी ह्या प्रकरणांत मंजुरी मेळूंक नाशिल्ल्यान न्यायालय दाखल घेवंक शकनाशिल्ल्याचें निरिक्षण नोंद करून खंडपिठान न्यायालयाचो आदेश रद्द केलो. हाची दखल घखेवन न्यायालयान शेट्येची वयल्या प्रकरणाच्या आरोपांतल्यान सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
