भांगरभूंय | प्रतिनिधी
फातोड्ड्यां गॅरेजीचेर पडलें झाड; वेळसांवां शेडीर पडलो माड
मडगांव: ओर्ली वाठारांत बोराचें झाड पडून दोन मोटारींचें सुमार दोन लाखांचें लुकसाण जालें. फातोड्ड्यां एका गॅरेजीचेर झाड पडून 50 हजारांचें जाल्यार वेळसांवां शेडीचेर झाड पडून 50 हजारांचें लुकसाण जालें.
साश्ट म्हाला सयत दक्षीण गोंयांत घोग्यांनी पावस पडत आसा. वादळी वाऱ्या सयत पडपी पावसाक लागून झाडां पडून लोकांचें लुकसाण जायत आसा. मडगांव उजो पालोवपी दळान दिल्ले म्हायती प्रमाण, कोलवें पुलीस स्टेशना कुशीच्या भितरल्या रस्त्यार आंबाड्याचें झाड दनपारां साडेतीन वरांचेर पडलें. ओर्ली घोडेंनायकवाड्यार बोराचें झाड पडून मारुती ओमनी आनी मारुती व्हॅगनर ह्या दोन मोटारींचें दोन लाखांचें लुकसाण जालें. जाल्यार 45 हजारांचो म्हालवज वाटायलो.
धर्मापूर वाठारांत आंब्याचें झाड राखणे वण्टीचेर कोसळपाची घडणूक सकाळीं घडली. मुरिडा फातोड्ड्यां गॅरेजीचेर झाड पडून 50 हजारांचें लुकसाण जालें. जाल्यार 40 हजारांचो म्हालवज वाटावपाक उजो पालोवपी दळाक येस आयलें.
वेळसांवां दामोदर हॉटेला कुशीचे शेडीचेर दनपारां दोन वरांच्या सुमारा झाड पडून 50 हजारांचें लुकसाण जालें. जाल्यार पांच हजारांचो म्हालवज वाटायलो.
वेर्ण्यां राज इन्क्लेव्ह इमारतींतलो मिटर जळिल्ल्यान धा हजारांचें लुकसाण जालें. आयडीसी वेर्ण्यां डी लींक कुशीक सकाळीं रस्त्यार झाड पडलें. कांसावले चर्ची कुशीक रस्त्यार माड पडून येरादारीची कोंयडी जाली. उजो पालोवपी दळान माड कापून रस्तो मेकळो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
