भांगरभूंय | प्रतिनिधी
फोंडें : उसगांवच्या आदल्या पुलाक फाल्यां 26 जुलयाक 60 वर्सां पुराय जातलीं. गोंयचें खनीज हेर देशांनी व्हरपाक ह्या पुलाचें योगदान म्हत्वाचें मानतात. कितलींशींच वर्सां खनीज म्हालाची येरादारी ह्या उसगांवच्या आदल्या पुला वयल्यान जाताली. पुर्तुगेज राजवट सोंपून लेगीत आजूनय पुर्तुगेजांनी उबारिल्ले प्रकल्प वापरप जाता.
पुर्तुगेजांनी हो पूल मोडून घालपाचो निर्णय घेतिल्लो. ताका लागून पुलाच्या दोनूय वटांनी जेलेटीन भरिल्ले ट्रक दवरिल्ले. भामय हांगा कार्यरत आशिल्ल्या पुर्तुगेज अधिकार्याचे थळाव्यां कडेन बरे संबंद आशिल्ल्यान स्फोट करचे पयलीं तांणी थळाव्यांक थंयच्यान हेर सुवातेर वचपाचो सल्लो दिल्लो. लोक गेल्या उपरांत पुर्तुगेजांनी पुलाचेर स्फोट केलो. ह्या स्फोटांत उदकांत उबे आशिल्ले पुलाचेर चार खांबेच उरले. उपरांत भामय आनी उसगांव गांवांचो संपर्क तुटलो.
19 डिसेंबर 1961 दिसा गोंय मुक्त जालें. उपरांत गोंय सरकारान हो पूल दुरुस्त करून लोकांची वेवस्था केली. 26 जुलय 1963 वर्सा पुलाचें उक्तावण जालें. हो 60 वर्सां आदलो पूल आजूनय लोक वापरतात. ह्या पुला कुशीक आनीक एक पूल उबारिल्ल्यान आतां आदल्या पुला वेल्यान वचपाक जड वाहनांक बंदी घाल्या.
भामयचे धनंजय चावडीकार हांणी सांगलें, हांगाच्या आदल्या पुलान खनीज येरादारी करपाक व्हड योगदान दिलां. राज्यांत नवे प्रकल्प कोसळपाच्यो घडणुको घडटात. पूण उसगांवचो पूल आजूनय घटमूट आसा, अशें तांणी म्हणलें.
ज्ञानेश्वर उर्फ ज्ञानी नायक हांणी ह्या आदल्या पुला वयल्यान खुबश्या लोकांनी दर्यांत उडी मारून आत्महत्त्याय केल्यात अशी शंत उक्तायली. पूण हालीं अश्यो घडणुको उण्यो जाल्यात. आदल्या पूल नुस्तेमारी करपा खातीर उपेगी थारता, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
