मोंते गिरींत बंगलो फोडलो
भांगरभूंय | प्रतिनिधी
भांगरभूंय । प्रतिनिधी
म्हापशें : मोंते गिरी सोमारा सांजे बंगलो फोडून चोरांनी रोख रक्कम आनी भांगराच्यो वस्ती तशेंच हेर मोलादीक सामान चोरून व्हेलें.
ही चोरयेची घडणूक सोमारा सांजे 4.30 ते 5.45 वरां मजगतीं घडली. फिर्यादी आंतोनेत डिक्रुझ आनी तिचो घरकार घर बंद करून दोतोरा कडेन गेल्लीं. वर भरान तीं घरां परतल्या उपरांत बंगल्याच्या मुखेल दाराची खिळी मोडून चोर भितर सरिल्ल्याचें दिसून आयलें. तीं घरांत भितर सरलीं तेन्ना तांचो बॅडरूम तशेंच आल्मारी फोडिल्ल्यो. सामान सगळ्याक उडयिल्लें.
तांणी रोखडीच हे घडणुकेची म्हयती म्हापशें पुलिसांक दिली. निरीक्षक सीताकांत नायक आनी वांगडी पुलिसांनी घडणुके सुवातेर येवन पंचनामो केलो.
मजगतीं, हो बंगलो मोंते गिरीच्या मुखेल रस्त्यार आनी लोक वसणुकेंत आसा. ही चोरी लागसारच्या वाठारांतल्या चोरांनीच केल्या आसतली असो दुबाव डिक्रुझ कुटुंबान उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
