भांगरभूंय | प्रतिनिधी
मडगांव: नेसाय वाठारांत 13 नोव्हेंबर 2022 दिसा पयशां खातीर अख्तर रझा कुसनूर हाचो खून केल्ल्या प्रकरणांत मायणा कुडटरी पुलिसांनी संदीप गुप्ता (22, रा. दिकरपाल, मूळ बिहार) हाका अटक केल्ली. न्यायालयान साश्टींत रावचें न्हय आनी दर आयतारा पुलीस स्टेशनार हजेरी लावप आनी हेर अटीं सयत दुबावीत गुप्ताक सशर्त जामीन मंजूर केला.
फाटल्या वर्सा नोव्हेंबर म्हयन्याचे 17 तारखेक नेसाय हांगासरल्या कानाला कुशीक तकलेक गंभीर मारपेट केल्ली आनी कुशिल्ली कूड सांपडिल्ली. चवकशे उपरांत ही कूड अख्तर रझा कुसनूर हाची आशिल्ल्याचें स्पश्ट जालें. मायणा कुडटरी पुलिसांनी 24 वरां भितर तपास लावन दुबावीत संदीप गुप्ताक अटक केल्ली.
अख्तर रझा कुसनूर हो नुस्तें विकतालो. त्या वेवसायांतल्यान मेळिल्ले सुमार 30 हजार रुपया ताच्या बोल्सांत आशिल्ले. त्या पयशां खातीरूच दुबावीत संदीप हाणें ताचो खून केल्ल्याचें चवकशे उपरांत मुखार आयिल्लें.
न्यायालयान 25 हजार रुपयांचे हमी सयत दर सप्तकाक आयतारा मायणा कुडटरी पुलीस स्टेशनार सकाळीं 10 ते 12 वरां मजगतीं हाजेरी लावप आनी साश्ट म्हाला भायर राबितो करप ह्या अटींचेर जामीन मंजूर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
